Sentru izolamentu Vera Cruz. Imajen TATOLI/Egas Cristóvão.

DILI, 27 abríl 2021 (TATOLI)—Funsionáriu Ministériu Saúde (MS) ne’ebé durante ne’e responsabiliza dadus no prosesu pagamentu ba kompañia fornesedór hahán inklui otél-sira ne’ebé Governu kontrata ba kuarentena ho izolamentu, infetadu ka pozitivu COVID-19, nune’e difikulta pagamentu.

“Funsionariu hosi departamentu Finansa infetadu COVID-19, difikulta pagamentu ba kompañia-sira. Tanba kolega-sira ne’ebé kaer dadus ba otél no fornesimentu hahán ne’e pozitivu, oras ne’e daudaun sei iha izolamentu,’’ Diretór Nasionál Orsamentu no Jestaun Finansa, MS, Miguel Maria hateten ba Tatoli iha, Caicoli, tersa ne’e.

Notísia relevante:MS prepara-tan fatin neen ba izolamentu pasiente COVID-19

Nia dehan, otél no kompañia fornesedór hahán ne’ebé durante ne’e Minsitériu Saúde kontrata, prosesu la’o hela tanba Governu sei selu.

“Durante ne’e ami follow up lor-loron no balun telefone hodi ameasa katak, bainhira la halo pagamentu sei la fó hahán ba izolamentu no kuarentena. Ami hatán ba sira katak, sei selu hotu tanba ita tuir sistema. Meiu komuikasaun mak  tenki asegura katak, ita boot sira-nia osan sei la lakon tanba Governu asina ona kontratu. Lalais ka kle’ur sei selu,’’ nia esplika.

Iha fatin hanesan, Diretór  Nasionál Aprovizionamentu, MS, Nelson Guterres Castro, hateten prosesu pagamentu ba fornesedór hahán no otél la’o tuir nafatin prosesu Governu-nian.

“Sistema ne’e la’ós ita halo ohin prosesu hotu agora la’e,  tenki liu hosi prosesu naruk,’’ Nelson Guterres Castro esplika.

Nia fó-sai katak, pagamanetu ba fornesimentu hahán, tinan kotuk no agora orsamentu ne’ebé alokadu hamutuk  millaun $2-resin no iha rihun $300-resin mak  seidauk halo pagamentu, tanba sei prosesa hela.

Kona-bá alojamentu, osan alokadu hamutuk millaun $2-resin no balansu ne’ebé seidauk selu hamutuk rihun $200-resin, maibé sei prosesa hela tanba pagamentu ne’e fazeadamente, no kompañia-sira hatama invoice mak foin halo pagamentu.

Oras ne’e daudaun kompaña fornesedór hahán ne’ebé Governu liu hosi Ministériu Saúde kontrata  hamutuk sia, no otél ba izolamentu no kuarentena hamutuk 17.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here