Liña frente simu vasina AstraZeneca doze dahuluk, sesta (16/04). Imajen TATOLI/António Gonçalves

DILI, 27 abríl 2021 (TATOLI)–Governu liuhosi Ministériu Saúde (MS) implementa ona vasina ho tipu AstraZeneca tuir rekomendasaun Organizasaun Mundiál Saúde (OMS) iha Timor-Leste, ne’ebé tuir dadus, to’o sesta (23/04), ema na’in-20.526 iha territóriu tomak mak simu ona.

Maski nune’e, Ministra Saúde, Odete Maria Freitas Belo, hateten ema ne’ebé infetadu COVID-19 seidauk bele simu vasina.

“Sira ne’ebé daudaun ne’e pozitivu seidauk bele hetan vasina, liu tiha fulan neen mak foin bele tanba bainhira hetan ona vasina ita-nia isin koñese ona vírus ne’ebé iha ita-nia isin, entaun ita-nia isin dezenvolve hela imunidade no bainhira prosesu ne’e, ita prefere lalika fó lai vasina, husik nia dezenvolve kompletu ona maka fó vasina ho períodu hanesan. Ne’e siénsia mak hateten hanesan ne’e,” Ministra Saúde relata hafoin ramata enkontru ho Primeiru-Ministru, Taur Matan Ruak, iha Rezidénsia Farol, tersa ne’e.

Governante ne’e klarifika mós katak, ema ne’ebé simu ona vasina, sei iha posibilidade bele hetan moras COVID-19 maibé vírus ne’e rasik la forsa ona atubele hada’et tutan ba ema seluk.

“Antes kedan bainhira ema prodús vasina ne’e, matenek na’in sira dehan katak vasina ne’e bainhira ita simu doze kompletu maibé posibilidade atu da’et vírus ne’e iha tanba laiha vasina ida ninia efikásia ne’e to’o 100%, entaun sempre iha posibilidade atu hada’et maski ita simu ona vasina,” nia akresenta.

Ministra esplika, bainhira simu ona vasina no moras ne’e da’et, vantajen maka vírus ne’e la forsa ona atubele hada’et fali ba ema seluk no bainhira kona mós sei la moras todan ona.

“Signifika la presiza ba toba iha ospitál uza oxijéniu ho ventiladór,” nia hatutan.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here