Elikópteru ne’ebé Governu Austrália ho kompañia petrolífeira Santos aluga hosi kompañia aviasaun MCDERMOTT Austrália, tula hela apoiu umanitáriu ba Covalima. Imajen/Média SEPS.

DILI, 27 abríl 2021 (TATOLI)—Governu liu hosi Sekretária Estadu Protesaun Sivíl (SEPS), kontinua fó apoiu transporte emerjénsia hanesan elikópteru, ne’ebé iha segunda ne’e halo voo dahuluk iha dadeer ho espesial flight, hodi tula ekipa Sentru Integradu Jestaun Krize (SIJK), hamutuk ema na’in-neen (6) ba Suai, Munisipiu Covalima.

Ekipa SIJK na’in ne’en ne’e hala’o enkontru iha Covalima ho ekipa saúde munisipál durante oras balun, no iha oras 12:30, pesoál hirak-ne’e ho elikópteru kontinua semo fali ba Munisípiu Bobonaro, hodi hala’o serbisu ne’ebé hanesan to’o remata, hodi fila-fali mai Dili.

Notísia relevante:Entidade 47 fó ona apoiu umanitáriu liu hosi SEPS

Komunikadu ne’ebé Agência Tatoli asesu ohin, hateten iha tuku 14:30, elikópteru ne’e kontinua tula fali apoiu umanitáriu ba Covalima.

“Sasan hirak ne’ebé mak tula ba Covalima mak hanesan foos saka 30, susu-been kaixa 13, Mina Bimoli kaixa 13, biskuit kaixa 32, sardina kaixa 15 no biti saku neen,” komunikadu ne’e haktuir.

Tuir planu, tersa 27 abríl, elikópteru ne’e sei semo fali ba Postu Administrativu Quelicai, Munisípiu Baucau, Munisipiu Lautém no Munisípiu Viqueque, hodi tula apoiu umanitáriu ba komunidade  afetada inundasaun ne’ebé akontese iha 04 abríl.

Entretantu, Governu Austrália ho kompañia petrolífeira Santos aluga elikópteru ne’e hosi kompañia aviasaun MCDERMOTT Austrália, hodi bele fó apoiu ba Governu TL durante fulan ida to’o maiu-nia rohan, atu bele fasilita mobilizasaun ajudu umanitáriu ba populasaun ne’ebé la asesu ba estrada iha territóriu.

Tuir akordu, utilizasaun ba aviaun ne’e kada loron sei semo oras haat, hodi halo asisténsia umanitária.

Elikópteru ne’e ho kapasidade bele tula ema na’in-ualu no sasán tonelada ida ne’ebé bele tara de’it.

Jornalista: Eugénio Pereira

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here