Edifísiu Administrasaun Munisípiu Ainaro, Imajen/Tatoli Egas Cristóvão

DILI, 27 abríl 2021 (TATOLI)-Sekretária Administradór Munisípiu Ainaro, Aguida Judit Mendonça hateten, levantamentu dadus ba vítima dezastre naturál iha Munisípiu Ainaro provizóriu hamutuk uma-kain 301.

Nia hatutan, daudaun ne’e nia parte seidauk bele fó dadus loloos tanba levantamentu dadus tuir formatu hosi Ministériu Administrasaun Estatál (MAE) ne’e agora la’o hela.

“Dadus ba vítima sira ne’ebé afetadu ba dezastre naturál iha Munisípiu Ainaro provizóriu hamutuk uma-kain 301, uma hetan estragu totál no kmaan hosi dezastre naturál,” Aguida Judit Mendonça informa ba Agência Tatoli liuhosi telefónika, tersa ne’e.

Ainaro nia infraestrutura públika ne’ebé hetan estraga mak hanesan Ponte tolu kotu liga hosi Postu Administrativu Hatubuilico ba Aldeia Queorema hetan estragu maka’as, ponte Ainaro liga ba Hato-Hudo, mota Aso liga ponte Aiasa Manufahi hetan estragu. Nune’e mós estrada liga Hatubuilico Vila ba Lakeku hetan estragu, Aldeia Hatumeta-Udo liga ba Ainaro Vila no ba Suku Maununo hetan estragu hotu.

Infraestrutura públiku hetan estragu iha mós komunidade balu nia natar mota estraga no hosi dezastre naturál ne’e hamate mós abitante na’in-10 iha Anairo bainhira akontese udan boot, 04 abríl liubá ne’e.

“Ba ita-nia maluk ne’ebé mate ba kalamidade ne’e hamutuk ema na’in-10 ne’ebé na’in-hitu hetan no hakoi ona no na’in tolu to’o agora buka seidauk hetan,” nia hatutan.

Tuir nian apoiu emerjénsia ne’ebé parseiru internasionál no Governu nian daudaun ne’e distribui ba vítima sira estoke hahú menus ona entaun ida ne’e la sufisiente ba vítima sira iha Munisípiu Ainaro, tanba vítima sira presiza tebes apoiu emerjénsia.

“Ami pontu fokál sei halo esforsu  hela liuhosi meius kontaktu ba nasionál atu ami bele hetan ai-han no materiál balun hodi ajuda ba ita-nia vítima sira,” nia dehan.

Jornalista   : Arminda Fonseca

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here