Prokuradór Jerál Repúblika, José da Costa Ximenes. Imajen Tatoli/Dok

DILI, 27 abríl 2021 (TATOLI)—Bankada Congresso Nacional de Reconstrução de Timorense (CNRT) kestiona prosesu kazu pendente sira, maibé Prokuradór Jerál Repúblika (PJR) José da Costa Ximenes subliña Ministériu Públiku (MP) halo akuzasaun bazea ba prova ne’ebé forte la’ós akuza arbiru de’it.

Deputada Bankada CNRT, Bendita Magno kestiona PJR José da Costa Ximenes nia mandatu hotu ona maibé prosesu kazu boot sira pendente hela.

“Ita-boot nia mandatu ramata ona maibé kazu sira hanesan subornu CononoPhilips ne’ebé Prezidente CNRT ba sai sasin to’o ona iha-ne’ebé, kazu infrasaun iha RAEOA kona-ba USB ne’e nia prosesu to’o ona iha-ne’ebé, kazu Honglong to’o ona iha-ne’ebé,” Deputada Bankada CNRT ne’e levanta bainhira PJR José da Costa Ximenes aprezenta informasaun anuál ba PN, tersa ne’e.

Hatán ba pergunta ne’e, PJR José da Costa Ximenes esplika loloos ne’e kestiona kazu hotu-hotu, labele kestiona mak kazu balu de’it.

“Se ha’u mak halo fali pergunta, nusa mak la husu kazu ida millaun $10 monu iha portu Hera ne’e nia prosesu la’o to’o iha-ne’ebé ona, nusá mak ema la kestiona kona-ba relatóriu Kámara Konta 2014, 2015 nian. Keta hanoin José Ximenes tuur iha-ne’e la koñese buat ida. Kualkér akuzasaun ne’ebé ami-nia prokuradór sira defende ne’e laiha motivu polítiku, iha investigasaun hatudu prova ita akuza. Ha’u-nia konsiénsia trankilu, prova kuandu loos ita akuza. Se prova sira mais sufisiente ita ta’uk saida. Lalehan aban monu mós monu ba. Importante ita afirma ita-nia pozisaun tanba defensór ba Estadu ne’e labele tauk,” PJR José da Costa Ximenes afirma.

PJR esplika, desizaun ba kazu Honglong sai tiha ona no ema ida la kestiona maibé oras ne’e reprezentante povu sira foin mak preokupa. Loloos ne’e reprezentante povu sira hamutuk ho Ministériu Públiku halo polítika hodi apoia servisu MP nian.

“Agora kazu balun sei iha prosesu ne’e ita tenke limita, iha responsabilidade señor prokuradór ida haruka lista boot ida mai, ha’u dehan ida-ne’e ita lalika tau lai, iha-ne’ebá ne’e naran boboot iha laran hotu, kuandu la’o ne’e prosesu sei to’o iha-ne’ebá,” nia dehan. 

Nia hatutan, bainhira kazu ida ba tribunál tenke ho akuzasaun forte tanba la forte ema dehan prokuradór mak inkapasidade no ema kestiona mak Ministériu Públiku.

“Entaun sasán sira ita tenke kuidadu. Ha’u dehan ha’u-nia majistradu sira buat ida labele sai fonte ba polítiku sira hodi halo polítiku,” nia afirma.

Ministériu Públiku mós hanoin katak Estadu ida-ne’e la’ós boot sira mesak mak hanoin ba RDTL.

Nia fó ezemplu Eis, Ministra Finansa Emília Pires nia kazu iha 2014 to’o tiha iha Tribunál Rekursu maibé fila-fali ba Tribunál Distritál Dili (TDD).

“Nusá mak la husu pergunta ida-ne’e, ida-ne’ebé akuza tiha ona mós prosesu la la’o, tún no sa’e hela. Maibé, keta hanoin PJR mak kaer prosesu, ami la kaer prosesu, prokuradór sira mak kaer. Ida-ne’e mak autonomia majistratura. Ha’u haruka sira atu ba tuir norma la’ós tuir fali José Ximenes nia hakarak,” PJR José da Costa Ximenes hateten.

Jornalista: Evaristo Soares Martins

Editór: Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here