Segundu Komandante PNTL Munisípiu Dili, Superintendente Euclides Belo, entrega nesesidade bázika ba autoridade suku Liurai, Postu Administrativu Remexio, Munisipiu Aileu, segunda (26/04/21). Imajen/PNTL.

DILI, 26 abríl 2021 (TATOLI)— Komandu Polísia Nasionál Timor Leste (PNTL) Munisípiu Dili, apoia nesesidade bázika ba komunidade afetadu dezastre naturál iha Suku Liurai, Postu Administrativu Remexio, Munisipiu Aileu no mós Komandu PNTL Munisípiu Manatuto.

Apoiu ne’e entrega direta hosi Segundu Komandante PNTL Munisipiu Dili, Superintendente Euclides Belo, ba autoridade suku Liurai, akompaña hosi vítima afetadu iha Suku Liurai ho totál foos saka 100, super mie kaixa 100 no mós ba Komandu PNTL Manatuto foos saka 50 ho super mie kaixa 50.

Notísia relevante:Vise-MI apoia nesesidade bázika ba PNTL Dili

“Ita entrega foos 100, super mie 100 ba vítima-sira iha Suku Liurai Remaxio no Komandu PNTL Manatuto foos 50 ho super mie 50,” Eulides hateten ba jornalista-sira iha Komandu PNTL, Caicoli, Dili.

Euclides konsidera apoiu ne’e nu’udár asaun domin hosi Komandu PNTL Dili ho membru-sira hodi hato’o jestu solidariedade ba maluk vítima-sira bele utltapasa sofrimentu ne’ebé sira hasoru.

Nesesidade bázika sira-ne’e mai hosi doadór-sira hanesan Komunidade Madre Alma iha Timor-Leste, Assosiasaun Alumni Timoroan iha Austrália ne’ebé entrega materiál konstrusaun no sasán nesesidade bázika seluk-tan.

Antes ne’e, Komandu PNTL Dili entrega mós apoiu ba membru PNTL Dili na’in 68 ne’ebé afetadu ba dezastre naturál hanesan, foos no super mie ne’ebé hetan apoiu hosi Organizasaun Espoza Superiór Komandu (OESK-PNTL).

Jornalista: Eugénio Pereira

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here