Diretór Ezekutivu FONGTIL, Daniel Santos do Carmo simu vasina AstraZeneca. Imajen Tatoli/Arminda Fonseca

DILI, 26 abríl 2021 (TATOLI)-Membru Forum Organizasaun Naun Governamentál Timor-Leste (FONGTIL) na’in-50, segunda ne’e, simu ona vasina AstraZeneca.

Diretór Ezekutivu FONGTIL, Daniel Santos do Carmo hateten, FONGTIL nia membru-sira simu hotu vasina AstraZeneca tanba sira mós halo monitorizasaun ba situasaun COVID-19 hanesan Estadu Emerjénsia no serka sanitária.

“Ami hetan informasaun katak vasina ne’e bele aumenta ita-nia imunidade hodi hasoru  COVID-19, entaun ami halo desizaun ida atu vasina ho voluntáriamente tanba ami hanoin katak ami bele asegura ami nia-an hodi halo servisu atende komunidade,” diretór ezekutivu FONGTIL, Daniel Santos do Carmo, informa ba jornalista sira iha salaun FONGTIL, Caicoli, Dili.

Nia hatutan, membru FONGTIL sira presiza hetan vasina tanba sira halo servisu umanitária boot fó apoiu ba komunidade ne’ebé vulneravel liu afeta hosi inundasaun no FONGTIL mós hola parte liña frente ne’ebé sempre kontaktu fíziku ba ema barak.

“Ita seguru mak fó atendimentu ba ita-nia populasaun, nune’e mós ita fó ezemplu ba ita-nia komunidade ne’ebé hamosu dúvida ba vasina AstraZeneca,”  nia tenik.

Nia informa ohin membru FONGTIL ne’ebé simu vasina AstraZeneca iha mós antes membru na’in rua pozitivu ona ba COVID-19.

“Ita kada semana membru FONGTIL sempre ba hasai entaun kinta foin lalais ne’e sira foti swab rezultadu fó sai iha sesta (23/04) rezultadu pozitivu. Na’in rua ne’ebé pozitivu ne’e feto hotu,” nia afirma.

Ba membru FONGTIL na’in rua ne’ebé pozitivu ba COVID-19 daudaun ne’e koopera parte saúde tama ona izolamentu.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here