Ai-rin eletrisidade ne’ebé monu iha Laleia. Imajen/Simião da Costa

DILI, 26 abríl 2021 (TATOLI)—Dezastre naturál ne’ebé akontese iha loron 04 abríl, estraga sasán barak tantu komunidade nia hela fatin inklui infraestrutura públika sira hanesan estrada, ponte, no mákina distribuisaun bee-moos.

Administradór postu administrativu Laleia, Simião da Costa, hateten, desde akontese dezastre naturál, komunidade labele asesu bee-moos.

“Sira kuru de’it bee mota mak konsume ba nesesidade loron-loron tanba mákina fornesementu bee-moos ba komunidade Laleia tomak avaria no fiu kotu tanba udan no anin foin lalais ne’ebé rezulta ai-rin eletrisidade monu, nune’e liña eletrisidade atu hasa’e bee mós sofre hotu,” Autoridade postu ne’e dehan ba Agência TATOLI, via telefónika, segunda ne’e.

Nia haktuir, ai-rin lima ne’ebé liga ba mákina distribuisaun bee-moos monu durante akontese dezastre naturál.

Tanba ne’e maka to’o agora komunidade Laleia seidauk asesu bee-moos,” nia akresenta.

Hafoin akontese, Autoridade postu ne’e relata kedas situasaun ba Diresaun Servisu Água no Saneamentu munisípiu Manatuto.

“Ha’u hato’o ona pedidu no pesoál Servisu Água no Saneamentu munisipál hosi haree no identifika iha duni fallansu iha liña eletrisidade, tanba ne’e la konsege dada bee. Ha’u ko’alia ho sira katak sei komunika ba Diresaun Nasionál no posibilidade iha tersa ne’e sira sei tun halo manutensaun,” nia hatutan.

Maski nune’e, to’o agora ekipa hosi Eletrisidade de Timor-Leste (EDTL) seidauk normaliza ai-rin eletrisidade ne’ebé mak monu.

Iha sorin seluk, Administradór postu iha planu atu monta tanke distribuisaun bee-moos ida iha Laleia hodi fornese ba komunidade.

“Servisu inísiu ne’ebé mak ami halo ona maka iha tinan rua kotuk halo ona planu no daudaun ne’e implementa ona, maibé tanba situasaun surtu COVID-19 maka halo servisu paradu tanba ami iha planu foun liuhosi Programa Nasionál Dezenvolvimentu Suku (PNDS) no ami atu monta tan bomba bee-moos boot ida iha Laleia inklui tanke rezervatóriu bee maibé seidauk aselera prosesu ne’e tanba materiál seidauk dezloka to’o mai postu,” nia tenik.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here