Prezidente Repúblika, Francisco Guterres Lú Olo, Prezide Reuniaun Konsellu Estadu iha Palásiu Prezidente Nicolau Lobato, Bairru Pite, Dili, segunda, (26/04). Imajen Tatoli /Egas Cristovão

DILI, 26 abríl 2021 (TATOLI)—Hafoin reuniaun Konsellu Estadu no Konsellu Superiór Defeza no Seguransa, konsellu rua ne’e ho unanimidade rekomenda ba Prezidente Repúblika Francisco Guterres “Lú Olo” atu haruka karta ba Parlamentu Nasionál hodi halo estensaun ba Estadu Emerjénsia ba dala-XIII. 

Notísia Relevante: Governu kontinua propoin ba PR renova EE da-XIII

Xefe Kaza Sivil Prezidénsia Repúblika, Francisco María de Vasconcelos ko’alia asuntu ne’e, hafoin membru Konsellu Estadu no Konsellu Superior Defeza no Seguransa hala’o enkontru ho Prezidente Repúblika iha Palásiu Prezidensiál Nicolau Lobato, Bairru Pité, Dili.

“Konsellu rua ne’e, ohin, rekomenda ba Prezidente Repúblika, Francisco Guterres Lú Olo, atu hatutan pedidu Governu nian ba Parlamentu Nasionál (PN) hodi diskute no deside estende Estadu Emerjénsia (EE), nune’e fó ba Prezidente Repúblika hodi dekreta Estadu Emerjénsia ne’e,” Xefe kaza Sivíl esplika ba jornalista sira, segunda ne’e.

Nia hatutan, pedidu Governu nian atu estende Estadu Emerjénsia (EE) ne’e tanba dadus hosi Sentru Integradu Jestaun Krize (SIJK) haktuir katak kazu COVID-19 ne’ebé sa’e makaas tebes hosi transmisaun lokál ba transmisaun komunitária.

Sala Situasaun-Sentru Integradu Jestaun Krize (CIGC, sigla portugés) rejista kazu pozitivu COVID-19 foun iha domingu (25/04) ne’e hamutuk 89, rekuperadu 29 no kazu ativu ne’ebé baixa iha sala izolamentu hamutuk 1.016.

Hosi totál kazu foun ne’’e kompostu hosi mane 49 no feto 40, asintomátiku 74 (83,1%) no sintomátiku neen (16,9%). Kazu foun hirak-ne’e iha na’in-74 (83,1%) deteta tanba halo teste ho razaun atu halo viajen ka halo ona viajen ba muníspiu hafoin deteta pozitivu no sira-nia hela fatin iha Dili, iha cluster sira ne’ebé iha kazu detetadu barak.

Totál kazu konfirmadu kumulativu ne’ebé sura hosi 21 marsu 2020 to’o agora hamutuk 1.897 no totál detetadu 89 loron dimingu nian, na’in-70 hosi Dili no munisípiu seluk na’in-19.

Kona-ba medida prevensaun ba Estadu Emerjénsia ne’e, depende ba Parlamentu Nasionál deside ona pedidu estensaun ne’e mak hafoin Governu foti medida tuir dezenvolvimentu propagasaun COVID-19 ne’ebé iha.

Konsellu Superior Defeza Seguransa (CSDS) ne’ebé marka prezensa iha reuniaun ne’e mak atuál Xefe Estadu Francisco Guterres “Lú Olo”, Primeiru-Ministru Taur Matan Ruak, Ministru Defeza Filomeno de Jesus Paixão, Ministra Negósiu Estranjeiru no Kooperasaun Adaljiza Albertina Xavier Reis Magno, Xefe Estadu Maiór Jenerál F-FDTL, Tenente Jenerál Lere Anan Timur, Komandante Jerál PNTL Faustino da Costa, Cristina Alves da Silva, David Dias Ximenes Mandati, Ministra Saúde Odete Maria Freitas Belo, Ministru Justisa Manuel Cárceres, Diretór Ezekutivu FONGTIL Daniel Santos do Carmo, Abel da Silva.

Entretantu, membru Konsellu Estadu ne’ebé partisipa iha reuniaun ne’e mak atuál Xefe estadu Francisco Guterres “Lú Olo”, Prezidente Parlamentu Nasionál Aniceto Guterres, Membru Konsellu Ministru, Eduardo Barreto, Prezidente Komisaun Nasionál Eleisaun (CNE) Alcino Barris, eis Prezidente José Ramos Horta, Aurora Ximenes, Maria Dadi Soares Magno.

Notísia Relevante: Prezidente Repúblika dekreta Estadu Emerjénsia ba dala-XII

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here