Governu transporta-tan apoiu umanitáriu ho elikópteru ba Postu Administrativu Laclubar, Munisípiu Manatuto, domingu (25/04/21). Imajen/média MI.

DILI, 26 abríl 2021 (TATOLI)—Governu transporta tan apoiu umanitáriu ho elikópteru ba Postu Administrativu Laclubar, Munisípiu Manatuto, hodi oferese ba família afetadu dezastre naturál, iha 04 abríl.

Ekipa konjunta ne’ebe envolve ba transportasaun apoiu umanitáriu ne’e, kompostu hosi Gabinete Primeiru-Ministru, Ministeriu Solidariedade Sosiál no Inkluzaun (MSSI), Ministériu Defeza (MD) liu hosi FALINTIL Forsa Defeza Timor-Leste (F-FDTL), Ministériu Interiór (MI) liu hosi Sekretáriu Estadu Protesaun Sivíl (SEPS) no Polísia Nasionál Timor-Leste (PNTL).

Notísia relevante:SEPS apoia ona família 5.323 iha Dili

Ekipa ne’e estabelesida hodi refleta estrutura operasionál no hetan ona aprovasaun ho objetivu atu organiza operasaun voo aviaun elikópteru durante fulan ida iha Timor-Leste (TL), hodi halo distribuisaun apoiu emerjénsia ba família vitima ne’ebé afetadu ba dezastre naturál.

Xefe Gabinete MI, Francisco Maia, hateten sasán ba apoiu emerjénsia sira-ne’e mai hosi Governu, ajénsia internasionál-sira no mós setór privadu balun ne’ebé ho inisiativa rasik halo ona asaun karidade ba família vitíma-sira.

“Governu transporta tan apoiu emérjensia hanesan foos, biti, manta, latarias, bolachas no ita halo ona ba pakote, kompostu hosi hahán no mós la’ós hahán mai hosi MSSI, MI, ajénsia internasionál-sira ne’ebé lidera husi SEPS, domingu ne’e,” Franciso Maia hateten, liu hosi komunikadu ne’ebé Agência Tatoli asesu, ohin.

Nune’e mós Diretór Nasionál Jestaun Risku Desastre (DNGRD), Agostinho Cosme Belo, informa apoiu umanitáriu ne’e sei oferese ba família afetadu 391 iha Suku ne’en ne’ebé pertense ba Postu Administrativu Laclubar.

Tuir dadus ne’ebé iha, família 391 ne’e kompostu hosi suku Orlalan iha uma-kain 111, Suku Batara 126, Suku Funar 95, Suku Fatuk-Makerek 36, Suku Manelima 22 no Suku Sananain uma-kain ida.

Xefi Suku Orlalan, Carlos Alves, haksolok tanba Governu oferese apoiu emerjénsia ne’ebé bele hamenus sofrimentu populasaun iha situasaun ne’e.

Entertantu, Governu Austrália ho kompañia petrolífeira Santos, aluga elikópteru hosi kompañia aviasaun MCCDERMOTT Austrália ho númeru N365JA, hodi apoiu Timor-Leste ba mobilizasaun distribuisaun apoiu umanitáriu liu-liu ba iha área izolada durante fulan ida to’o fulan maiu nia-rohan.

Iha 22 abríl elikópteru ne’e hahú transporta apoiu umanitáriu foos saka 100, ikan lata sardina kaixa 50, super mie kaixa 100, biskuit kaixa 10, lensól karón tolu no sasán kuziña hamutuk 111 ba Postu Administativu Atauro, Munisípiu Dili.

Iha 23 abríl transporta lensól saka sia, ai-moruk vasina AstraZeneca kaixa tolu no livru pagamentu ho kaderneta kaixa ida hosi BNCTL ba Rejiaun Administrativa Espesiál Oe-cusse Amebeno (RAEOA) no bainhira fila hosi RAEOA kontinua transporta foos saka 65 ba postu administrativu Laclubar.

Iha 24 abríl 2021, aviaun ne’e kontinua lori sasán ba postu administrativu Laclubar hodi lori sasan kuziña hamutuk karón 89 no foos saka 115, inklui transporta ekipamentu saúde hodi prevene COVID-19 iha Munisípiu Bobonaro, mak hanesan hand sanitizer, luvas, máskara no seluk-tan.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here