DILI, 26 abríl 2021 (TATOLI)—Responsável ba ekipa Fly Timor, Pedro M. Carrascalão, prefere loke Ajénsia Viajen rasik hodi fasilita timor-oan sira halo viajen ba rai-li’ur, tanba nia nota katak durante ne’e ema balun hasoru difikuldade trata dokumentu bainhira atu halo viajen.
“Agora ha’u mós hakarak loke kompañia rasik, nune’e bele fa’an billete rasik no evita problema,” nia dehan hafoin akompaña timor-oan na’in-35 husu klarifikasaun Ajénsia Viajen relasiona ho billete, iha edifísiu Narpov Ateita, Fatuhada, segunda ne’e.
Notísia relevante: Timor-oan 35 husu Ajénsia Viajen Narpov Ateita devolve osan viajen
Ba kestaun ne’e, Pedro sei submete prosesu ba Servisu Rejistu no Verifikasaun Emprezariál, Institutu Públiku (SERVE, I.P).
“Loron 02 maiu bainhira SERVE loke, ha’u sei bá rejista atividade,” nia akresenta.
Aleinde ne’e, nia kompromete sei kontinua apoia Governu fó asisténsia úmanitaria ba timor-oan sira iha situasaun emerjénsia.
“Ba kestaun úmanitaria laiha problema tanba ha’u ho Malindo Air sira iha ligasaun hela,” nia hatutan.
Tuir nia, daudaun ne’e parte Governu liuhosi Sekretaria Estadu Formasaun Profisionál no Empregu (SEFOPE) husu ona nia atu buka dalan transporta traballadór timor-oan sira.
“SEFOPE husu ona ha’u buka dalan ba traballadór sira atu fila, maibé la’ós ne’e de’it tanba ita mós sei ajuda ita-nia maluk sira atu sai ba rai-li’ur,” Pedro Carascalão informa.
Jornalista: Natalino Costa
Editora: Julia Chatarina
