Estudante sira simu rezumu matéria iha eskola. Imajen TATOLI /Egas Cristóvão

DILI, 26 abríl 2021 (TATOLI) – Eskola Ensinu Báziku Filiál (EBF) Doque de Caxias Bemori prepara de’it dixiplina lima ne’ebé sai pontu importante hodi fó ba alunu-sira bazeia ba sumáriu ka matéria ne’ebé alunu-sira hetan.

Notísia Relevante : La prepara rezumu matéria, dirijente eskola-sira sei hetan xamada

Koordenadora EBF Duque de Caxias Bemori, Eliza Martins, segunda ne’e, informa  ba Agência Tatoli katak, dixiplina lima ne’ebé mak alunu-sira hetan ona maka Lingua Tetun no Portugés, Estudo do meio (siénsia naturál, siénsia sosiál), matemátika ho relijiaun morál.

“Ami fó de’it ba alunu-sira dixiplina importante lima ne’e tanba ami nia aula másimu ne’e akontese de’it iha janeiru tanba fevereiru ami nia eskola hetan tiha suspensaun tanba enfrenta pandemia  COVID-19 no kontinua tan ho estadu emerjénsia ne’ebé atividade aula la hala’o to’o ohin loron,” Eliza Martins haktuir iha EBF Duque de Caxias Bemori, Dili.

Koordenadora Eliza esplika katak loloos distribuisaun matéria ne’e hahú ona iha segunda ne’e, maibé eskola enfrenta difikuldade ho orsamentu atu halo kopia ba matéria-sira , ne’e-duni parte eskola deside husu apoiu ba maluk balun halo tiha kopia depois inan-aman sira mai foti matéria sira rasik mak sei selu.

Eskola EBF Dique de Caxias ninia alunu husi siklu 1,2 hamutuk 615 kompostu hosi mane 318 no feto 297. Profesores iha na’in 22; permanente 14, kontratadu ualu (8) maibé ida ninia kondisaun la permite.

Alunu-sira siklu 1,2 iha EBC Faról la hetan rezumu matéria 

Alunu eskola Ensinu Báziku Sentrál (EBC) siklu 1,2 Faról, Dili, la hetan distribuisaun rezumu matéria hosi eskola tanba alunu-sira ne’e hetan ona avaliasaun iha primeiru períodu.

Adjuntu Diretór EBF Faról, Nicolau Ximenes, informa ba Agência Tatoli katak agora daudaun  alunu siklu 1,2 sira mai atu foti de’it matéria atu bele lori ba estuda iha uma.

“Alunu-sira hosi siklu 1,2 ne’e dezde sira tama mai ami halo ona avaliasaun ba sira, ami  fó de’it livru ba sira atu estuda, depois mak ami haree sira-nia koñesimentu kona-ba alfabetu ho númeru to’o iha ne’ebé,”  Nicolau Ximenes  hateten iha eskola EBF Faról, Dili, ohin.

Nia  akresenta katak ba alunu siklu 3 maka hetan distribuisaun rezumu matéria. Maibé parte eskola la halo kopia, rezumu matéria sira ne’e taka de’it iha kuadru avizu depois mak sira mai hakerek ka bele uza meius seluk hodi lori bá estuda.

Nia esplika planu distribuisaun rezumu matéria ne’ebé edukasaun Munisípiu Dili kria ne’e, konsidera meius ida di’ak ona. Tanba difisil atu hasoru malu entre alunu ho profesores sira.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here