Administradór Postu Administrativu Laleia, Simião da Costa. Imajen /FB

DILI, 26 abríl 2021 (TATOLI)–Dezastre naturál ne’ebé akontese iha loron 04 abríl estraga natar komunidade iha postu administrativu Laleia, munisípiu Manatuto.

Administradór postu Laleia, Simião da Costa, hateten, dezastre naturál ne’ebé foin lalais akontese lori susar boot ba komunidade agrikultór Laleia tanba mota sobu natar no estraga hare sira ne’ebé komesa buras ona.

“Família na’in-238 nia natar hetan estragu hosi mota durante inundasaun, hare iha natar laran bee lori hotu, balun rai-henek taka metin no estraga hotu to’o agora seidauk hatene ektare hira mak sofre,” Autoridade postu ne’e informa ba Agência TATOLI, via telefónika, segunda ne’e.

Nia haktuir, udan kuaze loron rua tomak no volume mota mós tun maka’as hodi estraga komunidade nia natar, hahú hosi suku Kairui to’o postu administrativu Laleia kompostu hosi suku rua hanesan suku Hatu-ralan no Lifau.

Nia dehan, ministériu relevante fó ona instrusaun ba autoridade sira hodi rekolla dadus estragu.

“Provizoriamente ami rekolla ona dadus no tuir orientasaun hosi ministériu, dadus sira ne’e balun submete ona ba munisípiu no balun tempu badak sei submete tan.

Mota sobu moru irrigasaun Bulutu ne’ebé lokaliza iha postu administrativu Laleia, munisípiu Manatuto. Imajen/Simião da Costa

Aleinde ne’e, inundasaun estraga mós moru ne’ebé satan bee iha irrigasaun Bulutu.

“Irrigasaun Bulutu ne’ebé mak hetan estragu uitoan maibé la implika fornesementu bee ba natar populasaun nian, maibé afeta de’it ba moru ne’ebé satan bee no la diretamente ba kanál irrigasaun,” Simião da Costa subliña.

To’o oras ne’e, komunidade afetadu sira seidauk hetan apoiu ruma hosi entidade relevante sira.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here