Xefe Bankada CNRT, Duarte Nunes. Imajen Tatoli/Egas Cristóvão

DILI, 26 abríl 2021 (TATOLI)—Deputadu sira bankada Congresso Nacional de Reconstrução de Timorense (CNRT) seidauk simu vasina AstraZeneca tanba reprezentante povu sira la’ós liña frente iha prevensaun no kombate propagasaun surtu COVID-19.

Notísia Relevante: Bankada CNRT propoin sosa vasina Pfizer’s

“Ami seidauk vasina, la’ós dehan bankada mak mak fó orientasaun lae, ne’e Liberdade. Maibé, ami fó hanoin katak ema na’in de’it mós lakohi vasina ba sira-nia joven. Ita la’ós espesialista maibé na’in de’it mós dehan labele fó ba tinan 30 mai kraik. Ne’ebé, ami fó alerta de’it ba joven sira. Ita mós labele ba simu vasina ida ke ema barak rejeita,” Xefe Bankada CNRT, Deputadu Duarte Nunes, informa ba jornalista sira, iha resintu Parlamentu Nasionál, segunda ne’e.

Nia dehan, bankada CNRT nia deklarasaun fó hatene ba povu katak ema-ne’ebé na’in ba vasina ne’e lakohi fó ba nia ema sira be tinan 30 mai kraik, nasaun seluk ne’e to’o tinan 60 mós sira seidauk fó vasina.

“Ne’ebé la’ós dehan lakohi, ita hotu hakarak maibé ita tenke ho hanoin katak ita labele hetan ita-nia ema sai problema tanba ita hakarak lalais de’it. Ha’u lahatene, ha’u-nia kolega kompañeiru balun keta simu ona vasina karik, ne’e ha’u la hatene. Ha’u mós seidauk vasina. Ita husik balun vasina lai ba, depois ita sei vasina. Ha ’u la ta’uk mate ida, mate ne’e iha Maromak Nia liman,” nia dehan.

 Entretantu Deputada Bankada CNRT, Carmelita Caetano Monis, rekoñese seidauk simu vasina AstraZeneca tanba deputadu/a sira la’ós liña frente.

“Ha’u seidauk simu vasina. Primeiru, ha’u hakarak hateten hanesan ha’u la’ós liña frente. Ne’ebé, ita tenke fó oportunidade ba liña frente sira tanba Governu fahe tiha ona pursentu hanesan ba ekipa liña frente sira, ferik no katuas sira-ne’ebé idade tinan 60 ba leten, ema sira-ne’ebé ho moras krónika aas no mós ba liña fronteira sira,” nia hateten.

Governu, tuir nia, halo vasinasaun arbiru de’it tanba ema estranjeiru sira mós simu vasina hotu, tanba ne’e mak Bankada CNRT prefere ba ema sira-ne’ebé merese hetan opurtunidade.

Nia haktuir, peritu epidemiolójika sira fó-sai katak loloos ne’e atu hatene vasina AstraZeneca ne’e ninia kualidade di’ak ka ladi’ak tenke hein lai fulan neen dahuluk nian.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here