Atendimentu kliente iha sukursál BNCTL. Imajen/BNCTL

DILI, 26 abríl 2021 (TATOLI)–Banku Nasionál Komérsiu Timor-Leste (BNCTL, sigla portugés) introdús programa bankária moratóriu kréditu no kréditu foun, hodi salva no asegura kliente bele hetan apoiu ho mekanizmu ne’ebé iha fleksibilidade ba komprimentu obrigasaun.

Programa moratóriu kréditu, sei re-ajenda pagamentu obrigasaun prinsipál no juru ba kliente banku, individuál no negósiu durante fulan rua (maiu-juñu ka juñu-jullu 2021), ne’ebé sei prevee orsamentu másimu $13.000 la’ós hosi BNCTL nia rekursu no aplikasaun sei loke hahú hosi loron 01 maiu no sei taka iha 30 juñu 2021.

Enkuantu, programa kréditu foun, sei oferese kréditu foun ba nesesidade konsumtivu liuhosi produtu kréditu multi-uzu, Aswain, Bukae no negósiu, ho juru másimu 8%, ho rekezitu simplifikadu, ne’ebé ho másimu kréditu $25.000, ne’ebé sei konsede partikularmente ba funsionáriu kontratadu, permanente, benefisiáriu ne’ebé iha vensimentu fisku (saláriu) no regulár inklui negosiante sira ne’ebé prienxe kritéria.

“BNCTL introdús programa rua ne’e tanba kalamidade ne’ebé rezulta inundasaun estraórdinariu iha loron 04 abríl, ne’ebé afeta komunidade iha munisípiu balun inklui kliente BNCTL lakon membru família, estragu hela fatin, ekipamentu, no fatin negósiu ne’ebé sei lori impaktu ba atividade sira no presiza tempu no rekursu atu rekopera,” refere nota ne’ebé Agência TATOLI asesu, segunda ne’e.

Banku nasionál introdús programa rua ne’e ho razaun kliente sira ne’ebé iha obrigasaun kréditu iha banku ba objetivu oin-oin, sai vítima ba dezastre naturál, tanba ne’e Banku hakarak nesesita kondisaun no rekursu adisionál atu fó kondisaun finanseiru nune’e bele re-konstrui, reabilita, hadi’a no sosa nesesidade bázika.

Nota mós katak, kliente hanesan negosiante ne’ebé afetadu dezastre naturál, hasoru difikuldade atu kumpre obrigasaun mensalmente konforme kontratu inklui nesesita apoiu, rekursu adisionál, tanba ne’e liuhosi moratóriu kréditu ka finansiamentu adisionál bele normaliza atividade sira.

“Nu’udar Banku Estadu, BNCTL tetu no konklui katak tenke hatudu solidariedade, iha dever no responsabilidade atu fó liman hodi ajuda tuir papél no kbiit. Banku Nasionál konsidera ho seriedade bele prepaera kondisaun estraórinariu nune’e sei oferese fasilidade hodi bele salva kliente no asegura sei hetan apoiu liuhosi mekanizmu simples. BNCTL iha polítika no prosedimentu rasik atu responde ba situasaun difísil,” subliña nota hosi Banku Nasionál.

BNCTL disponibiliza programa moratóriu kréditu no kréditu foun ba kliente individuál no negósiu inklui komunidade sira ne’ebé hela iha munisípiu afetadu dezastre naturál ho nível médiu to’o grave hanesan Dili, Manatuto, Aileu, Liquiçá, Ainaro, Viqueque no Rejiaun Administrativa Espesiál Oé-cusse Ambeno (RAEOA).

“Afetadu direta ou médiu grave dezastra naturál bele benefisia programa ba rekonstrusaun, reabilitasaun no hadi’a hela fatin no sosa ekipamentu, sasán uma laran ka transporte privadu, rekonstrui, reabilita no hadi’a fatin negósiu, sosa sasán negósiu ou transporte negósiu,” esplika nota hosi BNCTL.

Ba kliente ka komunidade sira ne’ebé hakarak asesu programa rua ne’e, bele hetan aplikasaun no rekezitu iha portál BNCTL: www.bnctl.tl no submete aplikasaun ho dokumentu komprovativu sira ba email: moratoriumkreditu@bnctl.tl, bele mós via WhatsApp: 75600000 ka lori aplikasaun diretamente ba eskritóriu BNCTL iha munisípiu hitu.

Aplikasaun tenke prienxe kompleta ho loloos, anexa ho dokumentu komprovativa sira, asina formuláriu ne’ebé banku sei disponibiliza iha portál no bainhira iha dúvida ruma, bele vizita portál feedback@bnctl.tl, WhatsApp ka pájina Facebook: BNCTL Timor-Leste.

BNCTL sei kontaktu aplikante sira atu halo konfirmasaun no husu dokumentu adisionál ruma bainhira nesesária.

Avaliasaun no desizaun ba aplikasaun sei konklui entre loron 1 to’o 5 loron servisu bazeia ba prinsípiu ‘first in, first out’ no kliente sei hetan notifikasaun kona-ba aplikasaun liuhosi email, WhatsApp ka mídia seluk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here