AEJXTL oferese nesesidade bázika ba ekipa Halibur Laklo-Anan iha postu umanitáriu iha aldeia Haslaran, Suku Bemori, Postu Administrativu Na'in-Feto, Munisípiu Dili, domingu (26/04/21). Imajen/AEJXTL.

DILI, 26 abríl 2021 (TATOLI)—Assosiasaun Emprezáriu Joventude Xineza Timor-Leste (AEJXTL) oferese nesesidade bázika ba vitima dezastre naturál iha Postu Administrativu Laclo, Munisípiu Manatuto.

Nesesidade bázika ne’e entrega direta ba ekipa Halibur Laklo-Anan iha postu umanitáriu área Taibesi, Aldeia Haslaran, Suku Bemori, Postu Administrativu Na’in-Feto, Munisípiu Dili, domingu ne’e.

Notísia relevante:Xanana halibur Manatuto-anan apoia vítima dezastre iha Manatuto

Reprezentante AEJXTL, Rudi Kwan, hateten dezastre naturál ne’ebé akontese iha 04 abríl, halo populasaun lakon sasán uma-laran no balun lakon-vida, tanba ne’e ho apoiu oitoan ne’ebé iha, bele rekopera situasaun ne’e.

“Ami simu pedidu hosi postu halibur Laclo-Anan, ami oferese foos saka 100, roupa 2.000, sapatu 300, xinelus 200 ho sasán nesesidade seluk-tan,” Rudie Kwan informa ba jornalista-sira, iha Taibesi.

Koordenadór ekipa Halibur Laclo-Anan, António Cárceres de Carvalho agradese ba domin ne’ebé oferese hosi AEJXTL, atu bele tulun maluk afetadu-sira iha Laclo.

“Ami agardese ba apoiu ne’ebé maluk-sira oferese ona. Nu’udár Timoroan, ami apresia ho maluk xineza sira-nia laran di’ak,” nia agradese. 

Antes ne’e, Administradór Postu Administrativu Laclo, Samuel Rodrigues Pereira, relata, dezastre naturál ne’ebé akontese rezulta ema na’in-neen lakon-vida iha Postu Administrativu ne’e, kompostu hosi na’in-ida isin mate hetan ona, no na’in-lima seluk seidauk hetan.

Alende ne’e, inundasaun mós estraga natar ektare 5.000, estraga to’os ektare 200, mota sobu kolam-ikan 60, inklui lori plantasaun ho animal.

Dadus ne’ebé autoridade-sira hosi suku Hohorai, Lacumesac, Uma Kaduak no Uma Naruk rekolla, iha uma tolu (3) hetan estragu totál Uma 25 bee tama no uma 28 sai ameasa boot ba inundasaun.

Oras ne’e daudaun vítima-sira evakua provizóriu iha sede suku no salaun Parokiál, hodi hein situasaun rekopera, sei fila-fali atu hadi’a sira-nia hela fatin.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here