Ilustrasaun avaliasaun hakerek hosi alunu. Imajen/Nova Eskola

DILI, 25 abríl 2021 (TATOLI)—Eskola Ensinu Báziku Filiál (EBF) Kamea Rai-hun bainhira atu halo avaliasaun ba alunu 1o siklu, la halo rezumu matéria maibé bazeia ba avalisaun hakerek.

“Ba alunu primeiro to’o quatro anos, ami prepara de’it testu ba sira hafoin haruka hakerek tuir fali iha sira-nia kadernu maka profesór sira halo avaliasaun ba sira-nia kaligrafia,” Koordenadora Eskola EBF Kamea, Agustinha Fátima Gusmão, hateten ba Agência TATOLI, iha resintu eskola, Becora, domingu ne’e.

Kordenadóra ne’e dehan, bainhira rekolla ona rezultadu hosi alunu 1o siklu maka halo avaliasaun no define valór.

Enkuantu, parte eskola prepara rezumu matéria ba alunu 2o siklu (5o no 6o anos) tanba iha ona koñesimentu di’ak.

Tuir Koordenadóra eskola, atividade aprendizajen iha eskola ne’e la’o hanesan babain maibé kontinua kumpre distansiamentu fíziku.

“Prosesu ensinu aprendijazen fahe bá grupu rua, ne’ebé kada grupu hetan oras rua durante prosesu ensinu aprendijazen iha aula prezensiál,” nia esplika.

Totál alunu iha Eskola EBF Kamea hamutuk 357, ho profesór na’in-13, maibe na’in-rua ninia kondisaun la permite atu hanorin.

“Entaun  iha profesór voluntáriu na’in-lima mak prienxe hela aula, ho fasilidade eskola iha sala aula neen, sala ba profesór ida no koordenadora ida, inklui iha biblioteka ida maibé livru sira mak la sufisiente,” nia akresenta.

Jornalista: Tomé Amado

Editora: Julia Chatarina 

HAKEREK NO HATÁN

Please enter your comment!
Please enter your name here