Prezidente Repúblika, Francisco Guterres 'Lú-Olo'. Imajen TATOLI/António Gonçalves

DILI, 25 abríl 2021 (TATOLI)–Prezidente Repúblika (PR), Francisco Guterres ‘Lú Olo, aban (26/04) sei reune ho Konsellu Superior Defeza no Seguransa (KSDS) no Konsellu Estadu (KE) iha iha Palásiu Prezidénsial, Dili, hodi rona hanoin sira relasiona ho pedidu Governu ba renovasaun Estadu Emerjénsia (EE) ba períodu loron 30 ba oin.

Tuir nota ne’ebé Agência TATOLI asesu iha domingu ne’e, aban reuniaun KSDS sei hahú tuku 09:30 dadersan no reuniaun KE sei hahú tuku 11:00.

EE da-XII hahú hosi 03 abríl no sei termina iha 02 maiu 2021, tanba ne’e presiza renovasaun.

Iha 21 abríl 2021, Konsellu Ministru aprova renovasaun EE no hato’o pedidu ba Xefe Estadu tanba haree ba evolusaun epidemiolójika no proliferasaun kazu rejistadu ho COVID-19 iha nível mundiál, rejionál, inklui iha Timor-Leste ne’ebé númeru kazu pozitivu aumenta hosi loron ba loron.

Implementasaun EE nu’udar medida prevensaun no kontrolu ne’ebé di’ak liu atu hasees sidadaun hotu hosi moras Coronavírus, nune’e bele proteje saúde públika.

Hafoin Timor-Leste rejista kazu pozitivu COVID-19 na’in-1 iha loron 23 marsu 2020, Konsellu Ministru aprova hodi husu PR deklara EE, nune’e iha loron 27 marsu 2020 Xefe Estadu deklara EE dahuluk ba períodu loron-30.

Prezidente Repúblika uza nia poder konstitusionál tuir artigu 85,  alínea g, konvoka membru sira seluk hosi órgaun konsultivu hanesan KSDS no KE atu rona ida-idak ninia hanoin kona-ba pedidu deklarasaun EE hosi Governu.

Sala Situasaun-Sentru Integradu Jestaun Krize (CIGC, sigla portugés) iha 24 abríl 2021 fó sai katak kazu ativu COVID-19 hamutuk 956.

Jornalista: Osória Marques

Editora: Julia Chatarina

HAKEREK NO HATÁN

Please enter your comment!
Please enter your name here