Ministru Edukasaun Juventude no Desportu, Armindo Maia. Imajen TATOLI/Egas Cristovão

DILI, 25 abríl 2021 (TATOLI)–Ministru Edukasaun Juventude no Desportu (MEJD), Armindo Maia preokupa ho kondisaun Eskola Ensinu Báziku Filiál (EBF) Ailele-hun no Kamea Rai-hun ne’ebé hetan estragu tanba inundasaun ne’ebé akontese foin lalais ne’e.

“Ita haree kondisaun eskola rua ne’e afetadu, eskola EBF Ailele-hun ne’e grave loos, haris fatin eskola nia monu tomak maibé sorti konstrusaun forte hela ne’ebé eskola ne’e sei hamriik. Enkuantu Agora EBF Kamea Rai-hun ninia sala aula nakfera hotu no moru eskola nia mós monu. Tanba ne’e ita sei tau prioridade iha tinan 2022 atu hadi’a filafali,” Ministru Armindo Maia, informa ba Agência TATOLI, iha Eskola EBF Rai-hun, domingu ne’e.

Tuir Ministru, tanba kondisaun estragu ne’e la espera no la tama iha programa tinan ne’e, maka sei planeia ba tinan oin, maibé nafatin halo normalizasaun hodi bele asegura prosesu aprendizajen.

“Mota iha EBF Kamea Rai-hun ne’e mak tenki normaliza uluk hafoin bele halo konstrusaun foun ba eskola. Ita sei husu Ministériu Obra Públika (MOP) atu ajuda normaliza uluk mota, tanba durante ne’e ita haree de’it iha Eskola maibé la fo atensaun ba mota, hanesan ita soe osan de’it,” Ministru akresenta.

Ba kestaun ne’e, tuir governante ne’e, ministériu iha ona tékniku atu haree ba kondisaun sira no halo planu ba konstrusaun eskola rua ne’e.

Aleinde ne’e, MEJD sei husu apoiu ba parseiru dezenvolvimentu sira ne’ebé mak hakarak fó apoiu ba ministériu no sei oferese dadus eskola rua ne’e.

“Modelu eskola atu halo oinsá, ida-ne’e kompeténsia Diresaun Infrastrutura mak hatene no bainhira atu halo konstrusaun presiza mós halo uluk estudu,” nia hatutan.

Eskola EBF Kamea harii iha 1984 no hafoin ukun-an, eskola ne’e kontinua eziste no hetan apoiu hosi forsa Amerikanu sira.

Maibe tanba agora la hetan apoiu manutensaun, maka kondisaun fizíku eskola ne’e barak mak a’at ona hanesan plafon naksobu, parede eskola nakfera no rahun no seluk laiha espasu sufisienste ba alunu sira atu halimar tanba areadór eskola ne’e rabat ho mota no estarada.

Vizita Ministru Armindo Maia ba EBF Kamea Rai-hun no Ailele-hun hetan akompaña hosi Vise-Ministru, inklui dirijente MEJD no dirijente eskola rua ne’e rasik.

Jornalista : Tomé Amado

Editora: Julia Chatarina

HAKEREK NO HATÁN

Please enter your comment!
Please enter your name here