Arsebispu ba Arkidioseze Metropolitana Dili, Virgílio do Carmo da Silva. Imajen TATOLI/Egas Cristóvão

DILI, 25 abríl 2021 (TATOLI)-Arsebispu ba Arkidioseze Metropolitana Dili, Virgílio do Carmo da Silva, konvida sarani hotu atu ida-idak haree filafali ba espiritualidade atu nafatin tuir Jesus hanesan Bom Pastor.

“Iha domingu dahaat Páskua, konvida ita hotu tanba Jesus mak modelu Bom Pastor hodi bele sai hanesan inspiradór no motivadór, maibé hanesan Bibi Atan mós tenke haka’as-an atu la’o tuir bibi ne’ebé di’ak,’’ Don Virgílio hateten durante omília, iha misa Igreja Catedral, Dili, domingu ne’e.

Tuir Arsebispu, bainhira sarani atu banati tuir Jesus, sei la sura kolen tanba domin mak bele lori mudansa ka transformasaun.

“Ne’e duni sarani hotu reza ba an rasik, família, no komunidade sira, ba tempu susar nia laran hanesan COVID-19 no dezastre naturál atu ema hotu aprende hosi Jesus hanesan Bom Pastor atu sai Bibi Atan ne’ebé di’ak iha sosiedade no instituisaun saida de’it maka ema ida-idak lidera, maibé lori nafatin Jesus ne’ebé mak ita fiar no sai nafatin matadalan iha buat hotu ne’ebé ita halo,’’nia subliña.

Dom Virgílio dehan, liuhosi selebrasaun misa domingu dahaat Páskua, uma-kreda dedika nu’udar domingu Bom Pastor, ne’ebé hanesan loron ida la’ós atu hanoin de’it maibé lori atu harohan.

Nune’e mós, hanesan loron ida atu haklean reflesaun kona-ba mistériu boot vokasaun saserdotál no relijiozu sira ninian.

Iha leitura, Jesus rasik aprezenta nia-an hanesan Bom Pastor ne’ebé lori nia bibi to’o saran-an hodi fó ninia moris no tuir Bibi Atan di’ak, ne’ebé iha prontidaun no disponibilidade atu fó saran entrega.

“Bibi atan ne’ebé hatene tau-matan ho domin tanba nia iha razaun, maibé ema kontratu na’in ida nia servisu tanba nia interese no osan, maibé la’ós tanba nia iha duni motivasaun. Tanba ne’e hau hakarak konvida haree uitoan evanjelu São João kona-ba Bom Pastor,” nia akresenta.

Jesus nia imajen hanesan Bom Pastor, sempre mai ho bibi oan ida tau iha ninia kabas ida, hatudu kona-ba Bibi Atan ne’ebé kuida no hatene tau ninia bibi.

“São João hakarak haree buat ne’ebé furak, tan ne’e evangelista prefere ko’alia kona-ba Jesus nia beleza ne’ebé propoin mai ita ida-idak atu koko oinsá bele duplika haburas iha ita-nia moris,” Don Virgílio salienta.

Tuir observasaun Agência TATOLI, iha misa domingu  iha Igreja Catedral, sarani sira kontinua kumpre regra prevensaun COVID-19 hanesan uza máskara no tuur ho distánsia fíziku metru ida entre ema.

Jornalista: Nelson de Sousa

Editora: Julia Chatarina

HAKEREK NO HATÁN

Please enter your comment!
Please enter your name here