Membru HWI Timor-Leste hamutuk ho família vítima inundasaun, hafoin distribui sasán, iha Kapela Metiaut, sábadu (24/04). Imajen/Osória Marques

DILI, 24 abríl 2021 (TATOLI)—Membru Health Wealth International (HWI) Timor-Leste distribui nesesidade bázika ba vítima inundasaun iha suku Metiaut, postu administritrativu Don Aleixo, munisípiu Dili.

“Ami grupu HWI halo asaun karidade ba uma-kain 31 ne’ebé sai vítima dezastre naturál. Apoia ne’e tuir ami-nia forsa no kbiit, iha foos saka 31, mina, super mie kaixa 31, masin, masako, rinso, no sabaun,” Reprezentante HWI Timor-Leste, Eusénia dos Santos, hateten iha Kapela Metiaut, sábadu ne’e.

Iha fatin hanesan, Koodenadór Refujiadu Kapela Metiaut, Armando Correia, dehan, família vítima hamutuk 13 iha suku ne’e maka ho kondisaun grave tanba hetan impaktu inundasaun no rai monu no halo uma a’at hotu, tanba ne’e ho apoiu HWI espera bele ajuda.

“Ami agradese tebes ba kolega sira ne’ebé ajuda netik família afetadu hodi sustenta nesesidade loron-loron,” nia akresenta.

Tuir reprezentante, elika task force hosi Governu halo ona levantamentu dadus ba vítima dezastre naturál sira.

“Ita hein de’it bainhira mak Governu deside no distribui apoiu umanitáriu ne’e, maibé karik bele aselera materiál konstrusaun nune’e ita-nia ema sira ne’ebé mak agora iha Kapela Metiaut ne’e bele fila ba sira-nia hela fatin hodi toba hakmatek,” nia akresenta.

Bazaia ba levantamentu dadus  hosi Governu, família afetadu inundasaun iha territóriu tomak hamutuk uma-kain 28.734, ne’ebé desloka provizóriu ba sentru evakuasaun hamutuk 44 no hosi númeru ne’e, 30 mak iha Dili.

Maioria família mak fila ona ba sira nia hela fatin, maibé balun sei nafatin iha sentru evakuasaun tanba uma no sasán estraga totál durante dezastre naturál iha 04 abríl.

Jornalista: Osória Marques

Editora: Julia Chatarina

HAKEREK NO HATÁN

Please enter your comment!
Please enter your name here