Fatin Turizmu Komunitáriu iha Seloi Kraik. Imajen TATOLI/Natalino Costa

DILI, 23 abríl 2021 (TATOLI)—Ministériu Turizmu, Komérsiu no Indústria (MTKI) iha trimestre dahuluk konsege implementa programa turizmu komunitáriu iha munisípiu balun, maski programa balun seidauk konsege realiza tanba implementasaun Estadu Emerjénsia no Serka Sanitária.

“Turizmu komunitáriu la’o ona iha minisípiu balun no lansa ona. Agora daudaun prepara atu ba halo lansamentu iha munisípiu balun tan,” Ministériu Turizmu, Komérsiu no Indústria, Jose Lucas do Carmo da Silva, informa ba Agência TATOLI, iha resintu Parlamentu Nasionál, sesta ne’e.

Turizmu komunitáriu estabelese ona iha fatin lima hanesan Com iha munisípiu Lautém, Mota Bandeira iha munisípiu Ermera, Bee-manas Marobo iha munisípiu Bobonaro, Rekiraka iha munisípiu Viqueque, Seloi Kraik iha munisípiu Aileu.

Aleinde ne’e, MTKI hakarak integra komunidade iha prosesu turizmu komunitáriu iha fatin  ne’ebé estabelese ona tanba durante ne’e la entrega ba líder komunitáriu maibé ba administradór postu atu tau-matan.

Parte ministériu mós hakarak fó apoiu ba grupu kreativu ne’ebé hakarak harii fatin turizmu komunitáriu iha suku, postu administrativu no munisípiu.

MTKI iha papél dezenvove área turizmu komunitáriu no kulturál no kria Diresaun Nasionál Turizmu Komunitáriu no Kulturál, ne’ebé iha ligasaun ho Diresaun Jerál Turizmu.

Diresaun ne’e maka sei responsabiliza ba planeamentu, implementasaun no orientasaun polítika ne’ebé defini atu dezenvolve setór turizmu komunitáriu no kulturál.

Turizmu komunitáriu no kulturál ho modalidade turizmu ne’ebé iha karater relevánsia komunitária, ho prinsípiu partisipasaun direta komunidade, ba inkluzaun sosiál, sustentabilidade no dezenvolvimentu ekonómiku lokál ho ativdade turíztika rurál, relijiozu, kulturál, istóriku, ekoturizmu no servisu turíztiku lokál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here