Jerente Nasionál Kompañia Petrolífeira Santos, José Lobato ho Prezidente CVTL, Madalena Hanjam asina akordu ne’ebé asiste hosi SEPS Joaquim Gusmão, iha edifísiu CVTL, Formoza, Dili (22/04/21). Imajen/média SEPS.

DILI, 23 abríl 2021 (TATOLI)—Kompañia petrolífera Santos, oferese dolar Australainu rihun 250, liu hosi Cruz Vermelha Timor-Leste (CVTL), hodi fó-tulun família vítima dezastre naturál ne’ebé akontese iha  04 abríl.

Komunikadu ne’ebé Agência Tatoli asesu sesta ne’e hateten, asinatura Memorandu ba apoiu ne’e, entre Jerente Nasionál Kompañia Santos, José Lobato ho Prezidente CVTL, Madalena Hanjam, asiste hosi Sekretáriu Estadu Protesaun Sivíl (SEPS), Joaquim Gusmão iha edifísiu CVTL, Formoza, Dili.

Notísia relevante:Austrália ho Santos apoiu elikópteru hodi reforsa ajudu umanitáriu

José Lobato, hateten Santos iha kompromisu atu tulun timoroan-sira ne’ebé afetadu hosi inundasaun, liu hosi CVTL ne’ebé sai parseiru di’ak tebes ho SEPS.

Iha fatin hanesan Prezidente CVTL, Madalena Hanjam, agradese ba empreza petrolífera Santos ne’ebé tulun ona orsamentu ho montante bo’ot tebes ba CVTL, hodi apoia direta vítima dezastre naturál iha nasaun ne’e.

“Ida-ne’e hodi fó fiar ba ita-nia povu katak, sira la mesak maibé Governu sei tau atensaun nafatin. Kona-bá serbisu, CVTL la halo mesak, maibé ami serbisu hamutuk ho SEPS no liña ministériu-sira hodi asegura vítima dezastre naturál,” Madalena Hanjam hateten.

Antes ne’e CVTL mós iha postu evakuasaun ne’ebé akumula  família 84 mai hosi grupu vulnerável-sira ne’ebé afetadu hosi inundasaun hanesan bebé, inan isin-rua, ferik no katuas-sira.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here