Logotipu Conselho de Imprensa (CI). Imajen/Espesiál.

DILI, 23 abríl 20221 (TATOLI)—Conselho de Imprensa (CI) nu’udar instituisaun independente hosi Estadu ida-ne’e ne’ebé hala’o nia knaar importante sira tuir Lei Komunikasaun Sosiál, artigu 40 no 41 atu garante liberdade imprensa no liberdade espresaun, espesialmente atu garante no asegura implementasaun Kódigu Étika Jornalístika ihe kontestu kobertura, produsaun to’o publikasaun notísia mídia nian

Tuir nota imprensa kona-ba rezultadu monitorizasaun ba produtu jornalístiku ne’ebé, ohin (sesta, 23/04), Agênsia Tatoli asesu hosi Conselho de Imprensa ne’e haktuir; bazea ba rezultadu monitorizasaun no análíze hosi DDM (Dirasaun Dezenvolvimentu Analize Mídia) iha semestre dahuluk no iha inísiu períodu tranzmisaun lokál COVID-19 iha fulan marsu no situasaun kalamidade iha inísiu abríl 2021 ne’e, deskobre katak jornalista no meiu komunikasaun sosiál sira kontinua viola Kódigu Étika Jornalístika, prinsípiu universál jornalizmu no Lei Komunikasaun Sosiál.

Notísia sira-ne’ebé meiu komunikasaun sira publika, tantu mídia eletronika, jornál ka mídia online barak mak nafatin la balánsu (single source), laiha konfirmasaun ho fonte seluk, la halo verifikasaun ba faktu no fonte sira. Jornalista no editór sira mós nafatin hatama sira-nia opiniaun iha notísia laran no halo notísia bazea de’it asumsaun sein halo verifikasaun direta ba fonte informasaun hodi garante notísia nia objetividade. Ezemplu, notisia kona-ba aviaun Air North tula Banco Central nia sasán.

Iha parte seluk, kuaze notisia hotuhotu kona-ba asuntu COVID-19 laiha context no background, entau difisil atu aprezenta faktu no informasaun loloos hodi fó kompreensaun ba sidadaun hotu-hotu iha país ne’e.  Ezemplu, notísia RTL and TVTL kona-ba Armindo Borges nia mate ne’ebé tuir familia, nia mate la’ós tanba COVID-19.

Notísia hosi mídia públiku ne’e la tau context no background kona-ba oinsa prosesu tratamentu priméiru iha sala emerjénsia hosi médiku sira, prosesu teste swab no rezultadu husi laboratóriu no oinsa risku bainhira ema sira-ne’ebé sofre hela moras komplikadu teste pozitivu COVID-19.

Notisia kona-ba Aviaun Air North tula Banco Central nia sasán la aprezenta faktu loloos, maibé hato’o deit jornalista sira-nia asumsaun. Ezemplu, notísia hosi Tempo Timor ho títulu “Air North Tula Oje 2021 to’o ona TL”. Notísia ne’e la bazea ba faktu maibé bazea de’it ba jornalista nia asumsaun tanba laiha fonte no dokumentu ruma mak hateten ‘ida-ne’e osan hanesan notísia hosi mídia rua ne’e haktuir’.

Até dadauk ne’e públiku seidauk hatene loloos sasán saida loos mak aviaun tula mai tanba mídia ka jornalista sira laiha esforsu atu buka-tuir. Jornalista ka mídia mós la hato’o klaru no loloos kona-ba definiasaun OJE (Orsamentu Jerál Estadu), entaun notísia ne’ebé publika ne’e mislead.

Tuir Prezidente Konsellu Konsultivu Fundu Petroliferu (KKFP), Juvinal Diaz, OJ ne’e nu’udar kuantifikasaun planu governu nian ne’ebé ninia fonte mai husi fundu petroliferu, resita domestika no fundu imprestimu sira, entau OJE ne’e la’ós ho forma sasán ka osan ne’ebé aviaun ou kareta bele tula hosi fatin ida ba fatin seluk.

Conselho de Imprensa mós nota notísia ida hosi The Oekusi Post (TOP) ho títulu “Governu Manipula no Politiza COVID-19 Baukau no vídiu balu ne’ebé espalla iha mídia sosiál no publika iha TOP. Tuir Conselho de Imprensa, notisia no vídiu ne’e nia konteúdu la kontribui ba esforsu Estadu no povu Timor-Leste nian hodi halo prevensaun no luta kontra propagasaun pandemia global COVID-19 iha rai-laran.

Notisia no vídiu hirak ne’e intensionalmente prodús atu halo sidadaun sira la fiar ezisténsia no propagasaun COVID-19 no konsidera tranzmisaun lokál virus ne’e nu’udar manipulasaun polítika ida iha país ne’e.

Maske-nune’e, Conselho de Imprensa mós deskobre RTTL e.p. nu’udar mídia públiku no GMN nu’udar mídia privadu iha país ne’e kontinua tranzmite programa sira ne’ebé ajuda fasilita sidadaun sira hodi komprende perigu, risku no propagasaun pandemia COVID-19 iha Timor-Leste. Pur ezempu, RTTL e.p. nia programa Kafe Dader no GMN nia programa Dader Kmanek.

Tuir CI nia monitorizasaun, programa rua ne’e iha vantajen boot hodi tranzmite informasaun loloos no kredivel ba sidadaun sira liuhusu aprezentasaun fonte oioin. Liuliu iha kontestu prevensaun no luta hasoru COVID–19, RTTL e.p. ho GMN aprezenta ona médiku no sientista sira iha área saúde hodi esplika propagasaun pandemia COVID-19 ho ninia risku atu fó kompreensaun ba sidadaun sira.

Conselho de Imprensa mós nota katak mídia ka meiu komunikasaun sosiál sira seidauk hala’o ninia papél informativu ho másimu hodi tranzmite informasaun ba sidadaun sira liga ho situasaun kalamidade iha rai-laran. Antes inundasaun resente mosu iha teritóriu nasionál tomak, Dirasaun Nasionál Metorolojia no Jeofizika anunsia ona katak Sikloniu Tropikál Seroja sei mosu iha rai-laran entre Marsu ho Abríl. Infelismente, kanál mídia sira la konsege follow-up hodi intensfisikamente tranzmite informasaun ne’e ba sidadaun sira hodi sees no salva aan. 

Iha sorin seluk, Conselho imprensa mós identifika instituisaun Governu, hanesan Sekertáriu Komunikasaun Sosiál (SEKOMS) publikamente hato’o nia pozisaun hodi kontra no halo kampaña hasoru Ajénsia Notisioza Tatoli no mídia sira seluk nia notisia kona-ba inan-feto ida mate iha iha Tasitolu, konsidera notísia ne’e nu’udar hoax no fake news. Afinál notisia ne’e tuir duni kritériu no padraun jornalístika nomós prinsípiu jornalizmu ne’ebé eziste.

Bazea ba faktu no razaun sira temi iha leten, Conselho de Imprensa hakarak husu ba jestór meius komunikasaun sosiá no jornalista hotu-hotu atu:

  • Kumpre Kódigu Etika Jornalistika, hodi evita risku legál no ameasa iha futuru hodi garante liberdade imprensa no liberdade espresaun iha país demokrátiku Timor-Leste.
  • Evita publika notísia bazea de’it ba jornalista nia asumsaun no opiniaun, ne’ebé la bazea faktu no realidade loloos iha tereñu no mós sitasaun fonte nian. Tane-aas prinsípiu peace journalism hodi evita prodús not’isia sensasionál no provokativu ne’ebé la kontribui ba pás no estabilidade iha rai-laran.
  • Halo notísia ho balánsu kona-ba asuntu sira-ne’ebé kontroversál no sai ona polemika iha públiku no evita halo notísia ne’ebé akuzativu ka trial by the press hasoru ema ka instituisaun ruma.
  • Halo notísia ho context no backgound ho onestu atu aprezenta faktu no informasaun loloos ba sidadaun sira kona-ba propagasaun COVID-19, nune’e sira bele halo prevensaun.
  • Nafatin kumpre no halo reportajen tuir matadalan kobertura mídia ba COVID-19 ne’ebé hasai iha tinan kotuk (2020) hosi Conselho de Imprensa no UNDP koopera ho Asosiasaun Jornalista Timor Lorosa’e (AJTL) no Timor-Leste Press Union (TLPU).
  • Intensifikamentu públika ka tranzmite informasaun sira kona-ba klima no tempu ne’ebé nia fonte mai-hosi Dirasaun Nasionál Metórolojia no Jeofizika atu juda alerta sidadaun sira hodi evita dezastre naturál, hanesan inundasaun, rai-halai no rai-nakdoko.

Conselho de Imprensa mós uza biban ida-ne’e hodi husu mós ba sosiadade tomak no entidade sira Estadu nian atu:

  • Respeita jornalista sira- nia liberdade atu hetan asesu informasaun iha fatin públiku, liuhosi fasilita informasaun loloos no kredivel.
  • Husu ba autoridade sira atu uza direitu resposta ba konteúdu publikasaun sira karik laloos. No, husu ba meiu Komunikasaun Sosial sira atu respeita direitu retifikasaun ba publikasaun sira ne’ebé sala bazea ba Lei Komunikasaun Sosiál Artigu 34.
  • Atu tau matan nafatin ba serbisu Meiu Komunikasaun Sosiál sira, liuliu publikasaun notísia sira liuhusi fó sujestaun konstrutivu, atu hadia produtu jornalístiku ho kualidade hodi kontribui ba prosesu sosiedade demokratiku no hametin  demokrasia iha país ne’e.
  • Husu ba instituisaun sira Governu nian, liliu SEKOMS atu distingi ho loloos entre hoax, fake news no news, nune’e labele foti konkluzasaun sala hasoru notísia ne’ebé meiu komunikasaun sosiál sira públika hodi ikus mai hamosu konfuzaun iha públiku nia leet.
  • Husu ba Governu atu hadi’a infrustrutura RTTL e.p. nian hodi nafatin garante informasaun ba públiku. Tanbá durante tinan hirak nia laran RTTL e.p. sempre hasoru situasaun defisil tanbá inundasaun ne’ebé afeta funsionamentu RTTL e.p. rasik.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here