Ministru Asuntu Parlamentár no Komunikasaun Sosiál (MAPKOMS), Francisco Jerónimo. Imajen TATOLI/Egas Cristóvão

DILI, 23 abríl 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo, garante osan ministériu ne’ebé ko’a hamutuk millaun $1,7 iha Orsamentu Retifikativu atu reforsa fundu kontijénsia, sei la implika programa iha tinan ne’e.

“Ita-nia programa kontinua nafatin, maibé programa ninia rezultadu ikus ne’e mak seidauk hotu tanba foin iha trimestre dahuluk, ne’ebé ezekuta ona programa MAPKOMS hanesan projetu dijitalizasaun ba Rádiu Televizaun Timor-Leste, Empreza Públika (RTTL,E.P) ne’ebé realiza ona no tinan ne’e sei finaliza,” Ministru Francisco hateten ba Agência TATOLI iha Parlamentu Nasionál (PN), sesta ne’e.

Notísia relevante: PN ko’a millaun $1,7 hosi MAPKOMS reforsa fundu kontinjénsia

Tuir Governante ne’e, ministériu daudaun haree hela kondisaun no halo hela esforsu atu sukat kapasidade ministériu atu ezekuta osan ho di’ak.

Governante ne’e akresenta, projetu infraestrutura iha MAPKOMS hanesan harii torre RTTL,E.P maski tau ona orsamentu maibé estudu viabilidade rasik seidauk halo.

“Projetu sira ne’ebé atu la’o nafatin hafoin halo ajustamentu foun iha Orsamentu Jerál Estadu (OJE) 2022 tanba projetu sira ne’e iha ona estudu viabilidade. Enkuantu projetu ne’ebé iha mak hanesan torre RTTL, maibé ba projetu ne’e tau de’it osan seidauk estudu, maibé foin mak halo estudu tanba ne’e iha tinan ne’e sei ezekuta uluk parte balun no restu kompleta iha tinan oin (2022),” nia akresenta.

Redusaun ne’e iha verba despeza kapitál dezenvolvimentu ho tipu programa 439 kona-ba garante liberdade espresaun no asesu informasaun, ne’ebé iha programa ne’e dotasaun inisiál ho montante millaun $2,7, nune’e iha proposta-alterasaun deputadu sira ko’a millaun $1,7 no hela de’it millaun $1.

Hosi montante orsamentu millaun $1,7 ne’e prevee ba títulu dotasaun Governu tomak ho kategoria despeza bens no servisu ne’ebé iha programa 148 kona-ba kontinjénsia.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here