Primeiru-Ministru, Taur Matan Ruak, hamutuk ho membru Governu sira Partisipa iha debate orsamentu ratifikativu. iha sala plenária PN, sexta (22/04). Imajen TATOLI/Egas Cristóvão

DILI, 23 abríl 2021 (TATOLI)–Parlamentu Nasionál (PN) aprova ona proposta Orsamentu Retifikativu liuhosi alterasaun dahuluk Orsamentu Jerál Estadu (OJE) 2021 iha finál globál, ho rezultadu votasaun a-favór 44, abstensaun 20, no kontra 0.

Ho ida ne’e, Primeiru-Ministru (PM), Taur Matan Ruak, kompromete sei ezekuta orsamentu ne’e ho di’ak hodi responde ba kalamidade rua hanesan dezastre naturál no surtu COVID-19 iha Timor-Leste.  

 “Governu kompromete rejista preokupasaun Deputadu sira-nia no kompromete ezekuta orsamentu ho di’ak, liuliu tau-matan ba sidadaun ne’ebé iha momentu susar, tanba ita rekoñese foin dahuluk iha ita-nia istória enfrenta situasaun rua dala-ida de’it hanesan COVID-19 no dezastre naturál ne’ebé impoin sakrifísiu ba ita-nia sidadaun to’o barak lakon família,” PM hateten hafoin aprovasaun proposta Orsamentu Retifikativu iha finál globál, sesta ne’e.

Notísia relevante: PN aprova Orsamentu Retifikativu iha finál globál

Nune’e, Xefe Governu apresia no agradese ba Deputadu sira tanba halo ona aprovasaun orsamentu ne’e ho karater urjente.

 “Ha’u agradese ba resposta ne’ebé Parlamentu Nasionál fó ba Governu ninia pedidu hodi deskute orsamentu ho karater urjente. Ami apresia no hakarak ho laran tomak agradese pasiénsia, sakrifísiu no kontribuisaun ida ne’e,” nia akresenta.

PM dehan, Governu konkorda ho Deputadu sira-nia preokupasaun no opiniaun sira liuhosi intervensaun, ne’ebé hatudu prioridade dahuluk mak sidadaun sira no Governu mós komunga pensamentu ne’e.

Nune’e, esforsu hotu ne’ebé Governu halo ho objetivu atu hametin relasaun entre sira ne’ebé ukun ho povu.

Biban ne’e, PM Taur komprometidu Governu sei hamutuk ho povu atu rezolve problema sira iha rai-laran.

“Apela ba populasaun, inan-aman, no povu Timor Lorosa’e, ita sei hamutuk. Ita-nia istória hatudu ita nunka halai hosi dezafiu, tanba ita uza lian ne’ebé inan-aman sira hateten katak buat ne’ebé tau ona iha bikan laran ita sei la husik hela, ita sei simu no han hotu. Tanba ne’e ita prontu enfrenta, ita manan sé karik ita hamutuk iha aktus no liafuan tenke kontribui nune’e reforsa unidade no filleira atu infrenta situasaun sira ne’e,” Xefe Ezekutivu apela.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here