Serimónia funerál ba matebian Olga Mendonça iha semitériu públiku Becusse, sesta (23/04/21). Imajen Tatoli/António Gonçalves.

DILI, 23 abríl 2021 (TATOLI)—Família matebian agradese ba Governu tanba serbisu hamutuk hodi haloot ona mate-isin Olga Mendonça (61) ne’ebé hakotu iis ho COVID-19, iha semitériu públiku Becusse, Dili.

”Ami agradese ba parte hotu, liuliu Ministériu Saúde ne’ebé tulun ona família hodi haloot mate-isin tuir kultura,” Família matebian, Natalino Cortereal, hateten ba jornalista-sira iha semitériu públiku Becusse, sesta ne’e.

Notísia relevante:Família hein hela mate-isin Olga Mendonça iha Vera Cruz

Família matebian mós agradese ba líder karismátiku, Kay Rala Xanana Gusmão ne’ebé oferese  ona kaixaun.

Natalino Cortereal hateten, família sei kolabora ho parte saúde atu halo teste swab, nune’e evita transmisaun COVID-19.

Partisipa iha serimónia funerál ne’e reprezentante hosi pilár I ba planeamentu COVID-19, Prezidente Komisaun Omenájen, Virgílio Smith, família no hetan seguransa másima hosi membru Polísia Nasionál Timor Leste (PNTL) no FALINTIL Forsa Defeza Timor Leste (F-FDTL).

Bainhira lori sai mate-isin hosi sala izolamentu Vera Cruz, ba uluk rezidénsia família iha Lahane Osidentál durante oras ida, hafoin lori ba haloot.

Entretantu, istória klínika hosi matebian tuir Sentru Integradu Jestaun Krize (SIJK) katak, matebian hanesan pasiente pozitivu SARS-COV-2, kazu ne’e konsideradu COVID-19 kategoria grave, no ekipa konjunta saúde deside enkamiña ba izolamentu Vera Cruz, hodi halo tratamentu tuir protokolu médiku ne’ebé Timor-Leste adopta, inklui utiliza ventilasaun asistida liu hosi Continuous Positive Airway Pressure (CPAP).

Kazu ne’e konfirmadu pozitivu SARS-CoV-2 iha 19 abríl 2021, iha emerjénsia Hospitál Nasionál Guido Valadares (HNGV), ho cycle threshod (CT): N2 gene 31,7; E gene 30,1.

Matebian ho istória isin-manas ho me’ar besik semana ida molok lori ba emerjénsia HNGV, no mós istória tensaun-aas, ho diabetes ne’ebé la kontroladu no iha 22 abríl 2021, dadersan tuku 08:25 otl, pasiente iis-kotu ho rezultadu test PCR post-mortem Pozitivu SARS-CoV-2 ho Cycle Threshold (CT) N2 Gene 33; E Gene 35.

Notísia relevante:Xanana oferese kaixaun ba matebian Olga Mendonça

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here