Komunidade sira iha Comoro, kapitál Dili, entuziasmu troka voucher Cesta Bázika iha supermerkadu Leader, kinta (10/12). Imajen TATOLI/António Gonçalves

DILI, 23 abríl 2021 (TATOLI)—Ministériu implementadór programa Cesta Bázika, Ministériu Turizmu, Komérsiu no Indústria (MTKI) husu kompañia fornesedór atu aselera distribuisaun iha munisípiu sira inklui iha kapitál Dili, maski iha ona estensaun loron distribuisaun.

“Ministériu orienta sira tenke halo lalais tanba ita iha estensaun to’o 31 maiu,” Ministru Turizmu Komérsiu Industria, José Lucas do Carmo da Silva, hateten ba Agência TATOLI, iha resintu Parlamentu Nasionál, sesta ne’e.

Distribuisaun iha kapitál Dili reativa iha semana rua liubá, ne’ebé MTKI hahú retoma distribuisaun iha Becora no iha munisípiu Ermera, enkuantu semana oin sei kontinua ba fali área urbana seluk.

Governante ne’e dehan, distribuisaun Cesta Bázika ne’ebé responsável direta hosi MTKI atinje ona 70%.

“Husu ba kompañia sira atu kontinua submete ba regra Estadu Emerjénsia no Serka Sanitária nian, ne’ebé impoin regra sanitária,” nia akresenta.

Alende ne’e, MTKI submete ona pedidu dokumentu ba Ministériu Finansa (MF) no konsege halo ona pagamentu ba kompañia fornesedór hamutuk 50.

“Ministériu Turizmu, Komérsiu no Indústria responsável ba kompañia fornesedór 75, ho totál orsamentu millaun $11, ami konsege halo pagamentu ba kompañia maibé balun maka seidauk tanba tenke kompleta dokumentu,” Ministru informa.

Ministériu implementadór programa Cesta Bázika maka MTKI, Ministériu Agrikultura no Peska (MAP), Sekretaria Estadu Kooperativa (SEKoop), Sekretaria Estadu Ambiente (SEA) no Sentru Lojíztika Nasionál (CLN, sigla portugés).

Governu halo ona pagamentu ba 94 hosi kompañia 174, kompostu hosi MTKI ba kompañia 50 ho totál pagamentu $10.635.966,50, SEKoop ba kompañia 24 ho totál pagamentu $12.498.312,50, no CLN ba kompañia 20 ho totál pagamentu $2.200.064,30, nune’e, totál pagamentu ba kompañia 94 hamutuk $25.079.090, nune’e totál pagamentu kompañia 94 hamutuk $25.079.090

Jornalista: Natalino Costa

Editora: Julia Chatarina 

HAKEREK NO HATÁN

Please enter your comment!
Please enter your name here