Natar iha Atabae.Imajen Tatoli/Antonio Goncalves

LIQUIÇA, 23 abríl 2021 (TATOLI) – Dezastre naturál ne’ebé akontese iha territóriu nasionál, 04 abríl liubá ne’e, lori mós estragu ba natar liu ektare lima iha Loes, inklui mós povu agrikultura nia kintál balun iha Suku Vaviquinia, Postu Administrativu Maubara, Munisipiu Liquiça.

Notísia Relevante : Ponte Loes besik atu kotu

Xefe Suku Vaviquinia, Alcino Nunes hateten, komunidade agrikultór-sira iha Liquiça, liuliu hois parte Loes ho Maubara nian, tinan ne’e, sira sofre tanba sira-nia rezultadu agríkola bee lori hotu no ia-horis balun iha kintál-laran rai taka tanba inundasaun.

“Ita-nia agrikultór-sira barak mak iha ne’e sira nia produtu hetan estraga maka’as hanesan rai monu taka sira-nia to’os, balun mota sobu hanesan iha Loes ne’ebá iha natar liu ektare lima maka mota sobu. Ida-ne’e fó impaktu tebes ba ita-nia agrikultór-sira,” Alcino Nunes  informa  ba Agência Tatoli iha Liquiça, sesta ne’e.

Ho estragu ne’e,  autoridade lokál halo ona pedidu ba parte kompetente munisipál nian, maibé seidauk iha resposta.

Iha sorin seluk agrikultór Mateus dos Santos hateten, nia to’os sorin balu hetan estragu tanba rai halai.

“Ha’u nia to’os iha foho-lolon ne’ebá sorin balu ida ba hotu tanba rai halai kuaze ektare ida. Ami  hato’o ona ba Ministériu Solidariedade Sosiál no Inkluzaun (MSSI) Liquiça ajuda foos balu mai mais agora sente triste nafatin tanba batar no modo tahan lubuk ida mak estraga hotu,” nia hateten

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here