Ministra Saúde, Odete Maria Freitas Belo. Imajen Tatoli /Egas Cristovão

DILI, 23 abríl 2021 (TATOLI)Ministra Saúde, Odete Maria Freitas Belo, konfirma, membru Governu ida ho inisiál M.X, daudaun ne’e baixa hela iha sala izolamentu Vera Cruz tanba pozitivu COVID-19.

“Provizóriamente ha’u akompaña hela ninia kondisaun no daudaun ne’e di’ak hela, ita hein nia bele rekupera,” Ministra Saúde, relata ba Jornalista sira iha resintu Parlamentu Nasionál, sesta ne’e.

Kona-ba membru Governu ne’e nia kondisaun no uza ekipamentu, Ministra seidauk iha koñesimentu.

“Ha’u laiha informasaun katak nia uza ventilatór maibé nia uza okxijéniu tanba dada iis susar oituan,” Ministra klarifika.

Maski nune’e, Ministra Saúde ne’e la ko’alia katak governante ne’e grave ou lae tanba atu deklara kondisaun pasiente ida só médiku sira ne’ebé halo akompañamentu mak hatene.

Governante ne’e subliña, durante ne’e pasiente sira dala barak hili izola-an iha uma maibé ne’e risku boot tebes tanba iha situasaun balun kazu ne’ebé lijeiru bele monu ba moderadu.

“Ita nunka espera dezenvolvimentu pasiente ida, entaun pasiente ne’ebé sofre COVID-19 tenke tau iha fasilidade saúde sira nune’e profisionál saúde sira bele akompaña,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here