Prezidente Konsellu Veteranu, Vidal de Jesus Riak Leman. Imajen Tatoli/dok

DILI, 23 abríl 2021 (TATOLI)—Konstrusaun uma ba veteranu-sira ho grau luta tinan 20-24 nia laran to’o agora suspende provizóriu tanba pandemia global COVID-19 ho situasaun dezastre naturál, 04 abríl liubá.

Notísia Relevante : Governu aprova apoia $40.000 ba kada veteranu konstrui uma

“Uma ba veteranu ho grau luta tinan 20-24 ne’e iha faze konstrusaun nia-laran ne’ebé hahú iha fulan kotuk.  Se lasala, iha janeiru-fevereiru nia-laran, komesa tiha ona hodi hatuur aliserse no hada ona bloku. Maibé iha abríl ne’e ho dezastre naturál no situasaun serka sanitaria no konfinamentu domisiliáriu, impede tiha konstrusaun ba uma sira-ne’e,” prezidente Konsellu Veteranu, Vidal de Jesus “Riak Leman” hateten hodi responde Agência Tatoli iha nia servisu fatin, Dili, sesta (23/04).

Riak Leman hateten, karik inundasaun ho situasaun pandemia COVID-19 ne’e laiha, maka konstrusaun uma ba veteranu  balun termina ona no bele entrega ba benefisiáriu-sira.

Nia mós fó razaun katak ho serka sanitaria ho fasilidade públiku balun, hanesan estrada ho ponte balun hetan estragu difikulta movimentu transporta materiál  konstrusaun uma nian.

“Governu fó ona osan ba veteranu ka benefisiáriu ida-idak nia konta bankária ne’ebé bainhira de’it mak halo ne’e, fila fali ba ami ida-idak,  maibé labele dehan Governu seidauk fó osan ba uma nian ba veteranu, ha’u rasik simu ona osan no daudaun ne’e halo hela uma, maibé tan de’it inundasaun entaun seidauk kontinua,”, Riak Leman hateten.

Prezidente Konsellu Veteranu ne’e informa, uma veteranu ne’ebé agora iha faze konstrusaun ne’e ba na’in-90 tuir osan ne’ebé prevee iha OJE 2020 no iha 2021 nian sei aumenta tan ba veteranu liu na’in-10.

Jornalista   : Osória Marques

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here