Presidente CI, Virgílio da Silva Guterres. Imajen TATOLI/Antonio Goncalves.

DILI, 23 abríl (TATOLI)—Prezidente Conselho de Imprensa (CI), Virgílio da Silva Guterres, husu Governu atu identifika no buka edifísiu provizóriu ba Rádiu Televizaun Timor-Leste (RTTL,EP) tanba kondisaun edifísiu daudaun ne’e la seguru ba funsionáriu sira atu halo servisu.

Notísia Relevante: Governu Planeia Harii Edifísiu RTTL no Agência TATOLI

“Conselho de Imprensa husu ba Governu atu buka edifísiu provizóriu ba RTTL para ema sira-ne’ebé iha RTTL halo servisu, hodi hein ho edifísiu ne’ebé Governu planu hela atu konstrui. Tanba, ami tauk mosu hanesan siclone seroja ho anin-boot ne’ebé akontese iha Kupang-NTT ne’ebá, edifísiu RTTL ne’e bele monu tanba tuan demais ona,” Virgílio da Silva Guterres hateten liuhosi konferénsia imprensa ne’ebé hala’o iha iha salaun CI, Quintal Boot, Dili, sesta ne’e.

Virgílio Guterres hateten, mídia RTTL nu’udar mídia públika ne’ebé presiza transmite informasaun rai-laran ba públiku, tanba ne’e Governu tenke haree ba kondisaun infraestrutura tanba ema sira-ne’ebé servisu iha RTTL,EP iha situasaun defisil nia laran.

Tanba ne’e, Coselho de Imprensa husu ba Governu atu hadi’a infraestrutura RTTL,EP nian hodi nafatin garante informasaun ba públiku. Tanba, durante tinan hirak nia laran ne’e RTTL,EP sempre hasoru situasun defisil, hanesan iha tempu udan ne’e sempre hamosu inundasaun ne’ebé afeta ba funsionamentu RTTL,EP nian.

“Ami mós husu Governu liuhosi Ministériu Asuntu Parlamentar Komunikasaun Sosiál (MAPKOMS) no Sekretáriu Estadu Komunikasaun Sosiál (SEKOMS), primeiru atu identifika tanba tuir ami-nia observasaun ba edifísiu RTTL,EP nian ne’e, kondisaun la seguru ona ba ema atu halo servisu,” nia dehan.

Notísia Relevante: CAFI Aprova Prosesu Aprovizionamentu Konstrusaun Edifísiu TATOLI,IP-RTTL,EP

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here