Embaixadór Tailándia, Ekapol Poolpipat, entrega apoiu fundu ba Diretora Ezekutiva Fundasaun Alola, Maria Imaculada Guterres, iha Embaixada Tailándia, Farol, Dili. imajen Tatoli/Arminda Fonseca

DILI, 22 abríl 2021 (TATOLI)-Embaixadór Tailándia mai Timor-Leste, Ekapol Poolpipat, kinta ne’e,  apoiu fundu uitoan (la temi nia montante) ba Fundasaun Alola atu ajuda feto vulneravel-sira iha sentru evakuasaun-sira.

Embaixadór Tailándia, Ekapol Poolpipat hateten, kada tinan Tailándia sempre apoiu fundu ba Fundasaun Alola liuhosi programa Kapasita Dezenvolvimentu Hakbiit Feto iha Ekonomia, maibé tinan ida-ne’e, fó apoiu ekstra fundu uitoan atu ajuda ba feto vulneravel-sira hanesan inan fó susu labarik.

“Ami apoiu Fundasaun Aloka la’ós foin, maibé hahú hosi 2012 no tinan ida-ne’e, ami apoiu ekstra ida atu apoiu ba feto vulneravel-sira ne’ebé afetadu inundasaun foin daudaun ne’e,” Ekapol Poolpipat hateten ba jornalista-sira hafoin entrega fundu ne’e ba Fundasaun Alola iha Embaixada Tailándia, Farol, Dili.

Iha fatin hanesan, Diretora ezekutiva Fundasaun Alola, Maria Imaculada Guterres, hateten, kada tinan Embaixadór Tailándia apoiu fundu $3.000 ba fundasaun Alola, maibé tinan ida-ne’e sira fó fundu apoiu ekstra.

Fundu ne’ebé ohin Fundasaun Alola simu ona ba oin sira sei treinu grupu kapasitasaun suporta inan atu  haree atividade ba sentru evakuasaun 20 iha Dili, atu fó apoiu inan fó susu no inan labele fó xupeta ba labarik-sira uza.

Grupu suporta inan ne’ebé mak Fundasaun Alola treinadu tiha ona iha Munisípiu Dili, suku 36, sira iha abilidade ona no prontu atu hetan tan kapasitasaun ida kona-ba espesífiku liu hanesan fó akonsellamentu ba inan-sira ne’ebé durante ne’e uza susubeen formula tanba sira falta koñesimentu sei uza biberón entaun iha área ne’e impaktu boot tebes liuliu hamosu moras diarea.

“Ba oin  ita-nia Grupu Suporta Inan sei haree ba inan-feto sira iha sentru evakuasaun presiza hahán saida mak ami sei apoiu ho osan ne’ebé ohin simu, importante mak atu haree liu oinsá inan  konsumu hahán ne’ebé seguru fó susu ba labarik liuliu iha tempu emerjénsia ida-ne’e, sé labarik fulan-neen ba leten bele han ona, maibé kontinua fó inan-nia susubeen, no labele fó susubeen formula ba labarik-sira,” Maria Imaculada Guterres hateten.

Nia dehan, Fundasaun Alola tenke haree ba inan-feto sira ne’ebé agora afetadu ba inundasaun ne’e, tanba  iha situasaun difisil ida-ne’e inan barak menus informasaun sei kontinua fó susubeen formula ba bebé-sira ne’ebé fó impaktu boot ba labarik-sira tanba hamosu moras hanesan diarea no iis boot ba labarik-sira.

Jornalista       : Arminda Fonseca

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here