Labarik sira hela iha sentru evakuasaun Don Bosco Comoro. Imajen/Facebook: FMA Tatoli Ksolok Evangellu.

DILI, 22 abril 2021 (TATOLI)—Governu liuhosi Secretaria de Estado para a Igualdade e Inclusão (SEII) hamtuk ho Ministériu Solidariedade Sosiál no Inkluzaun (MSSI) iha koordenasaun atu halo akonselamentu ba inan-feton no vítima labarik afetadu inundasaun ne’ebé hela iha sentru evakuasaun.

Nitísia Relevante: MSSI rejistu ona labarik afetadu dezastre naturál hamutuk 1.209

“Liga ho inundasaun, ami iha ekipa ida harii depois inundasaun ne’e ami halo hela koordenasaun servisu hamutuk ho MSSI hodi halo akonselamentu ba inan-feton no labarik sira iha fatin evakuasaun iha Dili. Tanba, ita hotu hatene katak inundasaun ne’e halo ema trauma no tauk, tanba ne’e presiza halo akonselamentu liuliu ba labarik sira,” Secretaria de Estado para a Igualdade e Inclusão (SEII), Maria José Fonseca de Jesus, hateten ba Agência TATOLI liuhosi telefónika, kuarta ne’e.

Koordenasaun ne’e la’o hela maibé parte SEII nia papél ne’e la’ós diretamente implementa rasik maibé SEII halo advokásia no monitorizasaun, tanba iha implementasaun ne’e sei iha kestaun balun mak sai obstakulu.

Tanba, nia dehan, agora daudaun Komisaun Nasionál Direitu Labarik (KNDL) no United Nations International Children’s Emergency Fund (UNICEF), organiza hela animadór sira para bele anima vítima labarik sira iha fatin evakuasaun sira iha Dili laran.

Entretantu Komisária Komisaun Nasionál Direitu Labarik (KNDL), Dinorah Granadeiro, hateten ekipa hosi MSSI liuhosi KNDL ho UNICEF no SEII kontinua halo animasaun no akompañia ho programa monitorizasaun atu oinsá identifika ema halo violénsia iha fatin evakuasaun sira-ne’e.

“Agora daudaun ita la’o hela ho programa animasaun ba labarik afetadu inundasaun iha sentru evakuasaun 23 iha Dili no Sentru Hera maibé seidauk identifika ema halo violénsia. Maibé, ita kontinua halo monitorizasaun ba fatin hirak ne’e,” Dinorah hateten.

Kona-ba polítika Governu ba akonselamentu nian ba vítima sira, Komisária KNDL ne’e hateten bainhira identifika mak iha ema balun halo violénsia ruma mak ekipa konjunta hosi MSSI ho SEII sei halo akonselamentu no submete ba rede referál sira.

Maibé, nia dehan, ekipa animasaun no monitorizasaun maske la’o hela maibé SEII ho KNDL mós hanoin kria ekipa atu haree ba ema ka grupu ne’ebé trauma bainhira enfrenta inundasaun ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here