Primeiru-Ministru, Taur Matan Ruak, hamutuk ho membru Governu sira Partisipa iha debate orsamentu ratifikativu. iha sala plenária PN, kuarta (22/04). Imajen TATOLI/Egas Cristóvão

DILI, 22 abríl 2021 (TATOLI)—Rezerva kontinjénsia ho dotasaun inisiál millaun $19,163 sa’e ba millaun $65,152 tanba maioria deputadu sira propoin proposta-alterasaun hodi hasa’e fundu refere nune’e resposta cheias no inundasaun ne’ebé akontese iha loron 4 abríl.

“Totál orsamentu ne’ebé reforsa rezerva kontinjénsia hamutuk millaun $65,152,” Prezidente Parlamentu Nasionál, Deputadu Aniceto Longuinhos Guterres Lopes, aunsia liuhosi plenária, kinta ne’e.

Ho rezerva kontinjénsia millaun $19,163 ne’ebé Governu sente la sufisiente hodi responde situasaun kalamidade dezastre naturál entaun Governu husu deputadu sira reforsa rezerva refere, tanba ne’e mak hahú horisehik Parlamentu Nasionál kontribui millaun $2,5, MAPKOMS kontribui millaun $1,7

Ohin, rezerva kontinjénsia ne’e aumenta tanba hetan korte orsamentu hosi Ministériu Finansa rihun $204, ko’a kapitaliasaun ba BNCTL ho montante millaun $15, Ministériu Saúde kontribui millaun $1, Ministériu Edukasaun, Juventude no Desportu kontribui millaun $4,209, SEJD kontribui millaun $1,281, Ministériu Obra Públika kontribui millaun $3,762.

Ministériu Transporte no Komunikasaun kontribui rihun $908, Ministériu Agrikultura no Peska kontribui rihun $712, Ministériu Defeza kontribui rihun $603, Fundu COVID-19 mós hetan alterasaun millaun $3 hodi reforsa rezerva kontinjénsia, Ministériu ba Asuntu Kombatente no Libertasaun Nasionál kontribui millaun $2, 313, Hospital Nacional Guido Valadares kontribui rihun $750 no UNTL kontribui millaun $1,116.

Vise Ministra Finansa, Sara Lobo Brites, hateten ho reforsu ne’ebé deputadu sira propoin sei hasa’e iha montante rezerva kontinjénsia.

“Ita presiza reforsa por volta 3% entaun 3% ne’e korresponde ba montante por volta millaun $64 no nune’e ami pontifika hela proposta sira-ne’ebé mak deputadu sira aprova horisehik no mós orsida sei aprova. Purtantu rezerva kontinjénsia mak ita iha millaun $19,163,” Vise-Ministra Finansa Sara Lobo Brites, esplika liuhosi plenária, debate alterasaun OJE 2021, kinta ne’e.

Nia haktuir, proposta sira-ne’ebé horisehik aprovadu hetan ona millaun $23, 53 no mós agora hein hela proposta ne’ebé sei aprova tán bele to’o millaun $60,232.

“Ami haree katak ida-ne’e natoon Governu atubele atua ba situasaun kalamidade ne’ebé mak afeta ita-nia país,” nia dehan.

Proposta-alterasaun hirak ne’ebé hetan aprovasaun ne’e barak liu mai hosi Deputada Maria Angélica Rangel, Deputada Maria Angelina Lopes Sarmento no Deputadu Cornélio Gama ‘L7’.

Tuir observasaun Agência TATOLI nota katak proposta-alterasaun sei kontinua dikute hela no posibilidade númeru orsamentu reforsa kontinjénsia sei aumenta.

Jornalista: Evaristo Soares Martins

Editór: Cancio Ximenes   

PUBLISIDADEiklan

HAKEREK NO HATÁN

Please enter your comment!
Please enter your name here