Primeiru-Ministru, Taur Matan Ruak, hamutuk ho membru Governu sira Partisipa iha debate orsamentu ratifikativu. iha sala plenária PN, kuarta (22/04). Imajen TATOLI/Egas Cristóvão

DILI, 22 abríl (TATOLI)—Sekretária Estadu Juventude no Desportu (SEJD) lideradu Abrão Saldanha ‘Nokosiku’ kontribui millaun $1,523 reforsa fundu kontinjénsia atu fó resposta ba cheias no inundasaun ne’ebé akontese iha territóriu nasionál.

Proponente ba proposta ne’e mai hosi Deputadu Partidu Libertasaun Populár (PLP) no Deputada Irene Sarmento. Rezultadu votasaun ba proposta ne’e, a-favór 41, kontra 0 no abstensaun 19.

“Nune’e, Sekretaria Eestadu Juventude no Desportu nia orsamentu sofre alterasaun pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária, kinta ne’e.

Iha anexu tabela III kona-ba despeza órgaun no servisu Administrasaun Sentrál, ho títulu Sekretaria Estadu Juventude no Desportu (SEJD), sofre redusaun iha kategoria despeza kapitál dezenvolvimentu ho montante rihun $242.

Hosi montante orsamentu ko’a iha programa ho kódigu 301 kona-ba promosaun juvenil no desportiva rihun $137, programa ho kódigu 510 kona-ba boa governasaun no jestaun instituisaun sofre redusaun rihun $105.

Nune’e mós SEJD nia osan ne’ebé prevee iha transferénsia públika, programa 301 kona-ba promosaun juvenil no desportiva sofre redusaun millaun $1,281.

Hosi orsamentu SEJD nian ne’ebé sofre redusaun ne’e prevee fali ba Dotasaun Governu Tomak, iha bens no servisu hodi reforsa fundu kontinjénsia.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here