Prezidente Autoridade RAEOA-ZEESM TL, Arsénio Paixão Bano. Imajen/ZEESM-TL

DILI, 22 abril 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA), ohin, halo ona lansamentu ba vasina AstraZeneca ne’ebé fó prioridade liu ba ekipa frontline hamutuk 1.360.

Notísia Relevante: RAEOA simu ona vasina AstraZeneca hosi Ministériu Saúde

“Ami agora daudaun preparadu halo lansamentu vasinasaun AstraZeneca ba ekipa frontline sira hamutuk 1.360 maibé ida-ne’e halo fazeadamente to’o 27 abril,” Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, informa ba Agência TATOLI liuhosi telefónika, kinta ne’e.

Vasinasaun AstraZeneca ne’e sei fó prioridade liu ba frontline sira-ne’ebé servisu iha fatin perigu sira hanesan simu populasaun barak, inklui vijilánsia saúde sira no Unidade Polísia Fronteira (UPF).

Nune’e mós, vasina ne’e sei fó prioridade ba ema sira-ne’ebé halo servisu esensiál sira hanesan Servisu Água no Saneamento (SAS), Eletresidade de Timor-Leste (EDTL), servisu portuáriu no aero portu nian no postu saúde hotu-hotu iha RAEOA.

“Iha Gabinete Prezidente Autoridade nian, ha’u mak sei loke no simu vasina dahuluk ba AstraZeneca ne’e. Nune’e, bele fó konfiansa ba populasaun no frontline sira katak vasina ne’e di’ak no bele evita moras COVID-19,” nia dehan.

Prezidente RAEOA ne’e apela, maske iha populasaun balun ne’ebé hanoin rua-rua atu simu vasina AsrtaZeneca maibé nu’udar Timor-oan nafatin konvense malu katak liuhosi vasina mak bele solusiona no proteje ema ida-nia aan hosi moras COVID-19.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here