Vise-Ministru Interiór, António Armindo, entrega nesesidade bázika ba komunidade Beduku, (22/04/21). Imajen/Média MI.

DILI, 22 abríl 2021 (TATOLI)—Ministériu Interiór (MI) apoia nesesidade bázika ba família 263 iha área Beduku, Aldeia Fatumea no Turleo Suku Tibar, Munisípiu Likisa, ne’ebé afetadu ba dezastre naturál iha 04 abríl.

Apoiu ne’e oferese hosi Vise Ministru Interiór, António Armindo ba komunidade afetadu iha Beduku, kinta ne’e.

Notísia relevante:SEPS apoia ona família 5.323 iha Dili

“Primeiru Ministru orienta ha’u hodi mai iha-ne’e, hasoru-malu ho autoridade lokál no komunidade afetadu atu hahú fahe nesesidade bázika hosi Governu,” António Armindo hateten.

Nesesidade bázika ne’e mak hanesan foos, super mie no seluk-tan hodi bele hakmán família-sira perante situasaun ne’e.

Tuir dadús hosi autoridade lokál iha Beduku, família hamutuk 263 mak afetada ba inundasaun no uma 24 mak hetan estragu totál.

Dadus ne’ebé Sekretáriu Estadu Protesaun Sivíl (SEPS) identifika iha Munisípiu Dili, família 9.000 mak presiza hetan apoiu emerjénsia.

Hosi númeru ne’e to’o 19 abríl, família 5.323 mak simu ona apoiu no SEPS kontinua distribui ba sira ne’ebé seidauk hetan.

SEPS mós re-aloka ona apoiu emerjénsia hosi nasionál ba munisípiu-sira ne’ebé estok menus hodi bele distribui ba família-sira.

Dadus ofisiál hosi Governu liu hosi Ministéiru Administrasaun Estatál (MAE), provizoriamente to’o 22 abríl, iha família 28.734 mak afetada ba inundasaun iha territóriu.

Ekipa MAE, SEPS no seluk tan kontinua halo levantamentu, hodi identifika kategoria estragu natón, kamán no aat totál atu bele hetan apoiu rekoperasaun.

Jornalista: Nelson de Sousa

Editór: Cipriano  Colo

HAKEREK NO HATÁN

Please enter your comment!
Please enter your name here