Komunidade sira forma atu simu Cesta Bázika distribuisaun iha loja LD. Bross, Bebora, kinta (22/04). Imajen TATOLI/Natalino Costa

DILI, 22 abríl 2021 (TATOLI)—Ministériu Koordenadór Asuntu Ekonómiku (MKAE) antes ne’e koordena ona ho ministériu implementadór no Sala Situasaun-Sentru Integradu Jestaun Krize (CIGC, sigla portugés) atu retoma distribuisaun Cesta Bázika iha munisípiu Dili, Baucau nno Viqueque, maski daudaun ne’e munisípiu tolu ne’e iha hela períodu Serka Sanitária.

Ba kestaun ne’e, Koordenadór distribuisaun Cesta Bázika hosi Ministériu Turizmu, Komérsiu no Indústria (MTKI) iha loja LD. Bross, António da Conceição, husu autoridade lokál atu organiza sidadaun simu Cesta Bázika ho di’ak.

“Horiseik ami ko’alia ona katak kada uma kain ida, ema ida maka mai maibé ohin loron ne’e sira mai barak ona. Tanba ne’e ami husu atu organiza didi’ak distribuisaun,” Koordenadór dehan ba Agência TATOLI, iha loja LD. Bross, Bebora, kinta ne’e.

Notísia relevante: Ministériu implementadór-CIGC koordena retoma distribuisaun Cesta Bázika iha munisípiu tolu

Tuir responsável ne’e, distribuisaun Cesta Bázika iha loja ne’e hahú horibain rua.

Cesta Bázika ne’ebé atu distribui ba komunidade iha suku Caicoli, kinta (22/04). Imajen TATOLI/Natalino Costa

”Loja ne’e toma konta distribuisaun iha suku Caicoli, horibain rua ne’e aldeia tolu iha suku Caicoli maka simu ona hanesan aldeia 01, 02 no 03 no ohin ne’e 04 no 05 maka simu maibé seidauk hotu no sei kontinua,” nia akresenta.

Loja ne’e limita ema másimu na’in-lima atu simu Cesta Bázika tanba laiha espasu no iha sorin seluk atu kumpre regra distansiamentu fíziku, maibé komunidade sira la kumpre regra.

Iha fatin hanesan, Xefe aldeia 04, suku Caicoli, Jaime Gonçalves, rekoñese distribuisaun  iha loja LD. Bross ladún tuir regra, tanba ne’e nia parte hamutuk ho entidade relevante sei tau atensaun.

“Agora ita haree iha portaun ne’e seguransa de’it laiha no ema mai hobur malu hanesan ne’e ona, ita atu halo nusa,” nia lamenta.

Nune’e, nia husu autoridade kompetente atu tau regra rigór no defini ema hira mak bele mai simu produtu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here