Logotipu MEJD

DILI, 22 abríl 2021 (TATOLI) – Ministériu Edukasaun Juventude no Desportu (MEJD) hamutuk ho parseiru dezenvolvimentu hosi Austrália sei apoiu distribuisaun kaderneta eskolár iha pakote ba estudante-sira ensinu báziku siklu 1,2 iha territóriu nasionál.

Diretór Nasionál Kurríkulu, Pedro Ribeiro Gonçalves, informa kaderneta ba estudante-sira ne’ebé hetan apoiu hosi parseiru dezenvolvimentu  ne’e halo impresaun iha Vietnam no tempu besik sei halo distribuisaun.

Pedro Ribeiro Gonçalves, kinta ne’e, iha nia servisu fatin, informa, MEJD ho parseiru dezenvolvimentu halo tiha ona impresaun ba kaderneta, livru manual ba alunu-sira no profesór-sira iha tinan kotuk no impresaun ne’e halo iha Vietnam, tanba ne’e tempu besik sei halo distribuisaun.

Diretór ne’e esplika nia seidauk iha dadus  kona-bá totál kaderneta hira mak agora asegura hela iha armazén MEJD nian iha Bebora, Dili. Maibé fiar katak tempu besik ne’e bele halo ona distribuisaun.

Nia afirma katak durante ne’e kuaze eskola ensinu báziku iha territóriu TL la hetan kaderneta eskolár. Maibé, tinan ida-ne’e, inan-aman sira sei akompaña di’ak liután progresu estudante-sira nian liuhosi valor ne’ebé mak parte eskola sei prienxe iha kaderneta estudante sira nian.

Agência Tatoli tenta konfirma ho Ministru Edukasaun Juventude no Desportu, Armindo Maia iha Parlamentu Nasionál para atu hatene kuantidade no orsamentu hira mak ministériu utiliza hodi halo impresaun kaderneta eskolár iha Vietnam. Maibé Ministru Armindo Maia rejeita fó komentáriu.

Jornalista       : Tomé Amado

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here