Prezidente RAEOA-ZEESM,TL, Arsénio Paixão Bano. Imajen TATOLI/Egas Cristovão

DILI, 22 abríl 2021 (TATOLI)–Autoridade Rejiaun Administrativa Espesiál Oé-cusse Ambeno (RAEOA) komprometidu sei transporta Oé-cusse-oan ne’ebé iha Dili ba Oé-cusse maibé tuir etapa no autorizasaun hosi Sala Situasaun-Sentru Integradu Jestaun Krize (CIGC, sigla portugés).

Prezidente autoridade RAEOA, Arsénio Paixão Bano, hateten ninia parte halo esforsu atu COVID-19 iha Oé-cusse labele tama transmisaun lokál, tanba daudaun kazu pozitivu hosi rai-li’ur (transportadu).

“Ha’u-nia hakarak populasaun Oé-cusse iha Dili kalma, tanba autoridade halo esforsu atu moras ne’e labele tama Oé-cusse la’ós lakohi autoriza fila maibé autoridade simu kada faze, katak semana ida kuandu Ró Success tama, só bele simu ema na’in-40 to’o 50 de’it, nune’e ami bele haree no kontrola atu transmisaun lokál labele akontese iha Oé-cusse,” Arsénio afirma ba TATOLI via telefónika, kinta ne’e.

Prezidente autoridade konsidera, estudante no komunidade Oé-cusse ne’ebé halo konferénsia imprensa normál atu espresa sira nia motivu.

“Sira halo konferénsia imprensa ne’e laiha buat ida, hirus mós husik ba, maibé autoridade ninia serbisu maka atu proteje populasaun Oé-cusse hamutuk 85.000 ne’e livre hosi virus”, nia akresenta.

Notísia relevante: Estudante-sira no komunidade Oé-Cusse hakarak fila ona

Aleinde ne’e, sidadaun bele halo deslokasaun maibé ho autorizasaun hosi CIGC no hetan autorizasaun hosi autoridade RAEOA inklui asina deklarasaun katak hakarak tama kuarentena durante loron 14.

“Semana kotuk ró lori sidadaun na’in-40 resin hosi Dili bá Oé-cusse no daudaun iha hela kuarentena. Kuandu sira sai ona hosi kuarentena maka na’in-50 bele bá tan, maibé tenke ho karta autorizasaun hosi sentru integradu jestaun krize ho rezultadu teste swab negativu,” nia fó hanoin.

Tuir Prezidente RAEOA, maski rezultadu teste hatudu negativu, maibé tenke nafatin kumpre kuarentena. “Kuandu lakohi tuir regra ami sei la autoriza,” nia subliña.

Razaun autoridade autoriza de’it másimu ema na’in-50 tama Oé-cusse kada semana tanba espasu kuarentena iha RAEOA la sufisiente, maski Governu aplika ona auto-kuarentena maibé autoridade permite sidadaun ne’ebé deside auto kuarentena ho autorizasaun hosi ekipa Saúde.

“Ha’u husu ba Oé-cusse oan sira Dili atu hakmatek, tanba ami iha RAEOA proteje nafatin imi-nia inan-aman, lalika la’o tun-sa’e tanba moras ne’e hada’et maka’as, se presiza ajuda ruma kontaktu de’it ba Ministériu Solidariedade Sosiál no Inkluzaun ka kontaktu ajénsia sira hodi husu ajuda,” nia apela.

Jornalista       : Antónia Gusmão

Editora           : Julia Chatarina  

PUBLISIDADEiklan

HAKEREK NO HATÁN

Please enter your comment!
Please enter your name here