Primeiru-Ministru, Taur Matan Ruak, hamutuk ho membru Governu sira Partisipa iha debate orsamentu ratifikativu. iha sala plenária PN, kuarta (22/04). Imajen TATOLI/Egas Cristóvão

DILI, 22 abríl 2021 (TATOLI)—Ministru Finansa, Rui Augusto Gomes, konkorda proposta hosi deputadu sira-ne’ebé propoin ko’a millaun $15 hosi Banku Nasionál Komérsiu Timor-Leste (BNCTL, sigla portugés) hodi reforsa rezerva fundu kontinjénsia.

Proponente ba proposta ne’e mak Deputadu hosi Bankada FRETILIN, Francisco Miranda Branco no Joaquim dos Santos ‘Boraluli’.

Proposta númeru 32 ho rezultadu votasaun a-favór 41, kontra 2 no abstensaun 18.

“Kona-ba kapitalizasaun BNCTL, Governu hakarak agradese proponente sira tanba iha faze aplikasaun Serka Sanitária la permite atividade ekonómika la’o normál, tanba ne’e ami hanoin katak la’ós dehan atu kansela maibé espera katak iha Orsamentu Jerál Estadu (OJE) 2022 ita bele kontempla filafali atu nune’e investimentu sira bele la’o ho normál bainhira ita rezolve ona kestaun COVID-19,” Ministru Finansa hateten iha sala plenária Parlamentu Nasionál (PN) iha debate loron daruak Orsamentu Retifikativu iha faze espesialidade, kinta ne’e.

Iha proposta ne’e husu retira millaun $15 hosi títulu dotasaun Governu tomak (dotação todo governo), hosi kategoria despeza transferénsia públika no tau fali ba dotasaun Governu nian parte bens no servisu, nune’e reforsa fundu kontinjénsia hodi resposta ba dezastre naturál ne’ebé akontese iha loron 04 abríl 2021 liubá.

Governante ne’e konsidera, iha difikuldade bainhira atu implementa kréditu, iha situasaun ne’ebé ekonomia kuaze paralizadu.

“Iha faze ne’e, pelu kontráriu kréditu sei sai todan ba devedór sira tanba atividade ekonómika sira limitada. Ha’u hakarak husik dezafiu ida ba deputadu sira atu hanoin ba orsamentu 2022, ita bele halo polítika, perdaun dívida, parsiál ou totál. Ida-ne’e atu fó biban dala ida tán ba emprezáriu sira bele retoma filafali atividade iha tempu sira mai,” nia subliña.

Jornalista: Antónia Gusmão

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here