Atauro-oan sira tula hela sira-nia sasán ba bero iha tasi-ibun Sional, Dili nia oin hodi ba Atauro. Imajen TATOLI/António Gonçalves

DILI, 22 abríl 2021 (TATOLI)-Administradór Postu Administrativu Atauro, Munisípiu Dili, Mateus Belo, informa sira-nia parte submete ona dadus vítima dezastre naturál ba Munisípiu Dili, inklui kopia mós ba Ministériu Administrasaun Estatál (MAE).

“Postu Administrativu Atauro la akontese inundasaun hanesan mota sobu uma tanba Atauro rai lolon maka barak, nune’e,  bee mai ba liu tasi, ne’ebé la akontese inundasaun, maibé hosi dezastre naturál ne’e akontese anin sobu uma 16,” Administradór Postu Administrasaun Atauro, Mateus Belo, informa ba Agência Tatoli, liuhosi telefone, kinta ne’e.

Hosi uma 16 ne’ebé hetan estragu ne’e, iha uma neen maka hetan estragu total no uma 10 hetan estragu kaman.

Atauro nia infraestrutura públiku ne’ebé hetan estragu mak hanesan, estrada ligasaun Beloi ba Makdadi mak estraga totál, bee-matan Berau liga mai Atauro vila hetan estraga.

Nia afirma, kona-ba Governu nia apoiu ba vítima sira, dezde akontese anin sobu vítima sira-nia uma Protesaun Sivíl iha Postu Administrativu Atauro fó apoiu kedas ba vítima sira, no emprezáriu Atauro oan mós ajuda hotu ba vítima sira.

“Foin daudun ne’e mós ami hetan apoiu hosi Ministériu Administrasaun Estatál hamutuk foos saka 2.000 ne’ebé ami distribui ona ba vítima-sira inklui ba populasaun iha Postu Administrativu Atauro tomak tanba foos ne’e mai kona-ba serka sanitária nian,” Mateus Belo  hateten.

Nia argumenta, tuir planu hosi Sekretária Estadu Protesaun Sivíl (SEPS), katak ohin, sei transporta apoiu emerjénsia ba Atauro ho  elikópteru atu apoiu ba vítima dezastre.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here