Governu ho Parlamentu Nasional debate orsamentu ratifikativu iha faze Espesialidade, iha sala plenáriu PN, kuarta (21/04). Imajen Tatoli/Egas Cristovão

DILI, 21 abríl 2021 (TATOLI)—Primeiru-Ministru, Taur Matan Ruak, nu’udar Xefe Governu husu Parlamentu Nasionál ajuda halo ezersísiu hodi reforsa fundu rezerva kontinjénsia, nune’e bele responde dezastre naturál ne’ebé afeta populasaun iha territóriu nasionál.

Xefe Governu ko’alia asuntu ne’e, tanba haree bankada opozisaun sira propoin proposta refere liubá fundu COVID-19, tanba fundu ne’e Governu halo ona ezersísiu serka millaun $250.

“Ami hasai boot loos ona (millaun $250), karik proposta sira-ne’e ba iha dezastre naturál entaun ami komprende. Maibé komu ba hotu de’it COVID-19, tanba ne’e mak husu deskulpa barak. La’ós atu nega ita-boot sira-nia kontribuisaun,” Xefe Governu esklarese ba bankada CNRT nia proposta-alterasaun ne’ebé Governu la simu no la pasa iha plenária, kuarta ne’e.

Primeiru-Ministru esplika ba reprezentante povu sira katak, problema boot ne’ebé ne’ebé Governu hasoru mak fundu atu responde ba dezastre naturál, tanba ne’e mak husu deputadu sira halo ezersísiu iha uma fukun oinsá mak minimiza dezastre naturál iha Timor-Leste.

Xefe Governu haree katak, proposta sira-ne’e barak husu hasa’e osan ba COVID-19 maibé Governu halo ona ezersísiu to’o millaun $250, to’o ministériu balun sente katak tenke fó duni kontribuisaun tanba momentu ida-ne’e dolorozu loos.

Governu lakohi hasai fundu petrolíferu maibé iha problema entaun ezersísiu ida-ne’e mak tenke preparadu ba mudansa tanba dalabarak tau buat ida iha ulun atu hasai ne’e susar la halimar, maibé realidade tenke determina maneira oinsá responde situasaun sira-ne’e hotu.

Xefe Governu ne’e dehan, proposta Governu nian propoin millaun $223,8, ministériu hotu-hotu fó kontribuisaun 7% ekivalente ho millaun $37, tanba ne’e kuaze millaun $250 reforsa fundu COVID-19.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here