DILI, 21 abríl 2021 (TATOLI) –Senadu Universidade Oriental (UNITAL) husu ba departamentu sira atu orienta fakuldade ida-idak ko’alia ho dosente hodi prepara matéria semestre dahuluk ne’e ba estudante-sira atu estuda iha uma.
Magnífiku Reitór UNITAL, Florindo Pereira, relata katak desizaun ida-ne’e tuir universidade di’ak liu ona. Tanba antes ne’e universidade implementa ona programa estuda liuhosi plataforma online ka zoom, maibé dala barak enfrenta difikuldade tanba dosente barak la familiár ho plataforma online zoom ne’e.
“Ami foti ona desizaun iha enkontru senadu universidade katak dosente hotu-hotu sei prepara ida-idak ninia matéria depois tau iha fakuldade maka estudante-sira mai foti hodi estuda depois maka dosente sira sei fó fali traballu ruma ba sira hodi halo,” Florindo Pereira hateten ba Agência Tatoli iha UNITAL, Becora, Dili, kuarta ne’e.
Florindo Pereira afirma katak kuandu estudante-sira prontu ona ho matéria no traballu ne’ebé sira hetan hosi dosente-sira, depois maka sei prepara fali tempu hodi realiza ezame ba estudante-sira.
Nia dehan programa zoom ne’e dala barak sai difikuldade ba dosente-sira, maibé universidade husu ona ba parte IT atu ajuda fó formasaun ba dosente-sira, nune’e, sira bele utiliza.
Estudante 1.000-resin seidauk hetan kartaun Telkomcel
Oportunidade ne’e, Magnífiku Reitór UNITAL, Florindo Pereira, relata mós katak estudante foun liu 1.000 seidauk hetan kartaun sim operadór Telkomcel atu fasilita sira bele utiliza plataforma online zoom.
“Ami-nia estudante foun 1.000-resin ne’ebé foin tama, sira seidauk hetan apoiu kartaun sim hosi Telkomcel. Sira sei uza hela kartaun sim privadu hodi asesu ba matéria balun ne’ebé dosente-sira fornese liuhosi zoom,” nia klarifika.
UNITAL rasik nia estudante liu-6.000 maka hetan ona kartaun sim hosi Telkomcel ne’ebé Telkomcel rasik fornse livre internet ho kapasidade megabyte ida kada fulan.
Antes ne’e, UNITAL mós hetan fornesimentu pakote internet hosi Timor Telecom (TT) ho kapasidade megabyte lima hodi fhe ba dosente sira kapasidade internet megabyte tolu no ba estudante sira megabyte rua.
“Agora ami labele utiliza fornesimentu pakote internet gratuita hosi TT tanba fiu kotu hela to’o agora seidauk halo fali instalasaun,” nia tenik.
Klínika UNITAL
Magnífiku Reitór UNITAL, Florindo Pereira informa mós katak alumni na’in-lima formandu hosi fakuldade Saúde Públiku UNITAL preparadu ona atu hala’o servisu iha klínika UNITAL, maibé sei hein hela lisensa operasionál hosi Servisu Rejistrasaun no Verifikasaun Emprezariál, Institutu Públiku (SERVE,IP)
Médiku na’in-tolu ne’e kompostu hosi doutór na’in-rua no enfermeira na’in-tolu. Sira-ne’e depois hetan tiha graduasaun hosi UNITAL ba kontinua sira-nia eskola tuir títulu ne’ebé sira hetan iha rai-li’ur.
Nia afirma katak antes ne’e sira iha ona planu atu harii edifísiu foun ba klínika UNITAL nian no nia dezeñu ho BoQ preparadu hotu ona, maibé tanba situasaun kalamidade COVID-19 seidauk bele ezekuta tuir panu no alvu.
“Ami instala hotu ona fatin bá klínika ne’e, maibé ami seidauk bele hala’o tanba sei hein hela lisensa husi SERVE,” Florindo Pereira haktuir.
Nia hateten, maskeklínika ne’e loke iha UNITAL, maibé lataka ba komunidade ne’ebé hakarak mai konsulta. Tanba planu universidade nian hakarak mós fornese fasilidade saúde besik ba komunidade.
Jornalista : Tomé Amado
Editór : Francisco Simões
