Reprezentante Komandu Jerál PNTL, Superintendente Xefe José Soares no Segundu Komandante PNTL Díli, Superintendente Euclides Belo inklui reprezentante empreza Timor Holding, inaugura postu seguransa iha Bairru-Pité, (21/04/21). Imajen Tatoli/ Eugénio Pereira.

DILI, 21 abríl 2021 (TATOLI)—Kompañia nasionál Timor Holding serbisu hamutuk ho Komandu Jerál Polísia Nasionál Timor-Leste (PNTL), hodi konstrui postu seguransa ida ba Komandu Munisipiu Dili, iha Suku Bairru-Pité.

Postu seguransa ne’e konstrui kompleta ho salaun boot rua, dormitóriu rua, hariis fatin ida, kuziña, kompleta ho kadeira, meza no monta mós Air Condicioner (AC).

Notísia relevante:AEOS-PNTL apoia nesesidade bázika ba membru afetadu inundasaun

Vise-diretór kompañia Timor Holding, Joe Ribeiro, hateten postu seguransa ne’e harii bazeia ba pedidu ne’ebé Komandu Jerál PNTL hato’o, atu fasilita membru-sira nune’e bele hala’o seguransa liu-liu kontrola movimentu transporte públiku.

“Ami fó apoiu oitoan, ita lori took dezenvolvimentu ne’e ba oin. Ida-ne’e mak empreza Timor Holding kontribui ba PNTL,” Joe Ribeiro hateten ba jornalista-sira.

Parte Timor Holding lakohi fó-sai montante orsamentu ba konstrusaun, tanba apoiu ida-ne’e ho intensaun hakarak ajuda PNTL, liu-liu membru-sira bele utiliza hodi asegura Dili hosi violénsia no seluk tan.

Postu seguransa ne’e inaugura ona hosi reprezentante Komandu Jerál PNTL, Superintendente Xefe José Soares no Segundu Komandante PNTL Díli, Superintendente Euclides Belo inklui reprezentante empreza Timor Holding.

Jornalista: Eugénio Pereira

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here