Sekretáriu Estadu ba Formasaun Profisionál no Empregu (SEFOPE), Alarico do Rosário Imajen Tatoli/Egas Cristóvão

DILI, 21 abríl 2021 (TATOLI)—Sekretaria Estadu Formasaun Profisionál no Empregu (SEFOPE) hamutuk ho Embaixada Korea iha Timor-Leste, ko’alia kona-ba dezlokasaun traballadór timor-oan atu ba serbisu iha Korea Súl.

“Parte rua diskute hela no sei iha negosiasaun laran kona-ba transporte. Tanba prosesu bá Korea la henesan atu bá Australia,” Sekretáriu Estadu Formasaun Profisionál no Empregu, Alarico do Rosário hateten ba Agência TATOLI, iha resintu Parlamentu Nasionál, kuarta ne’e.

Notísia relevante: Traballadór 460 sei aranka bá Korea Súl hafoin aeroportu loke

Sekretáriu Estadu esplika, bainhira traballadór atu bá Korea, sira rasik mak trata no SEFOPE fasilita de’it.

“Ida-ne’e progresu di’ak, enkontru iha semana kotuk ko’alia ona kona-ba atu lori traballadór sira iha tempu badak nia laran inlui sira ne’ebé kontratu iha,” nia akresenta.

Banhira atu bá Korea iha nia regra rasik no limita mós ema ne’ebé atu tama ba nasaun ne’e.

“Ema labele liu hosi kuota ne’ebé sira define ona, tanba ne’e maka ita sei halo konfirmasaun ho sira. Tanba oportunidade ne’e ita bele haruka maibé ita presiza hatene, ita haruka ema maizumenus 100 mai kraik ne’e ita lakon. Tanba ne’e presiza tetu nune’e labele iha problema,” nia hatutan.

Korea mós simu traballadór hosi nasaun 11, tanba ne’e ba nasaun ida define mínimu ba kada dezlokasaun hamutuk ema na’in-50 hosi nasaun ida.

“Maibé ita iha pasu pozitivu ona, maizumenus iha fulan maiu nia laran bele haruka traballadór sira bá Korea,” governante ne’e tenik.

Traballadór regulár ne’ebé halo ona teste no foin dahuluk atu bá, iha kontratu hamutuk 420 ne’ebé hein atu aranka de’it.

Hahú tinan 2009 to’o 2020, traballadrórtimor-oan hamutuk 3.696 mak serbisu ona iha Korea Súl iha área peska, fábrika no agrikultura.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here