Governu ho Parlamentu Nasional debate orsamentu ratifikativu iha faze Espesialidade, iha sala plenáriu PN, kuarta (21/04). Imajen Tatoli/Egas Cristovão

DILI, 20 abríl 2021 (TATOLI)—Parlamentu Nasionál (PN) lideradu Deputadu Aniceto Longuinhos Guterres Lopes, kontribui millaun $2,5 ba fundu kontinjénsia nune’e órgaun ezekutivu bele responde dezastre naturál ne’ebé akontese iha loron 4 fulan-abríl liubá.

Prezidente Parlamentu Nasionál, Deputadu Aniceto Longuinhos Guterres Lopes, esklarese orsamentu inisiál millaun $3 ne’e destinada ba atu halo dezeñu, estudu no faze inisiál mobilizasaun konstrusaun edifísiu própriu PN nian maibé deside hasai millaun $2,5.

“Aproveita ho situasaun ida Estadu presiza reforsa rekursu finanseira hodi hatán ba krize (surtu COVID-19 no dezastre naturál), tan ne’e mak Parlamentu Nasionál kontribui millaun $2,5 ba rezerva fundu kontinjénsia,” Aniceto Guterres anunsia liuhosi plenária iha debate espesialidade orsamentu retifikativu loron dahuluk, kuarta ne’e.

Entretantu Deputada Maria Angélica Rangel ne’ebé sai proponenta ba proposta ne’e fundamenta, proposta-alterasaun atu ajuda Governu responde ba dezastre naturál.

“Parlamentu Nasionál iha kapitál dezenvolvimentu millaun $3 tanba situasaun obriga entaun Parlamentu Nasionál mós fó kontribuisaun millaun $2,5 tau bai ha dezastre naturál ne’ebé mak afeta iha loron 4 abríl,” nia esplika.  

Hatán ba asuntu ne’e, Ministru Finansa Rui Gomes, agradese ba reprezentante povu sira-ne’ebé fó kontribuisaun iha fundu kontinjénsia

“Ami kontente tanba Parlamentu Nasionál mós kontribui ba iha fundu kontinjénsia,” Ministru Finansa agradese.

Rezultadu votasaun votasaun ba proposta ne’e a-favór 43, kontra 0 no abstensaun 20 nune’e orsamentu privadu uma fukun nian sofre alterasaun.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here