Tenente Jenerál F-FDTL, Tito da Costa Cristovão ‘Lere Anan Timur’, Imajen/Media F-FDTL.

DILI, 21 abril 2021 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, ohin, hala’o enkontru semanál ho Prezidente Repúblika, Francisco Guterres Lú Olo, iha Palásiu Prezidénsiál Nicolau Lobato, Bairru Pite, Dili.

Iha enkontru ne’e, Tenente Jenerál Lere Anan Timur no Prezidente Repúblika ko’alia kona-ba COVID-19 liga ho juventude sira-nia hahalok hasoru pesoál saúde hodi la fiar katak COVID-19 ne’e eziste iha Timor-Leste.

Lere Anan Timur apela ba juventude no timor-oan sira atu tau konsiderasaun ba moars COVID-19 iha Timor-Leste no iha mundu ne’ebé hamate ema barak.

“Ohin, ami ko’alia kona-ba COVID-19 ne’e la’ós foin iha maibé kuaze tinan rua ona, ita moris hamutuk ona ho corona. Corona ne’e laiha aimoruk atu kura no nia aimoruk mak prevensaun ne’e de’it. Ohin, ami ko’alia utiuan kona-ba hahalok ita-nia joven hatudu iha fatin-fatin. Ezemplu iha Suai, Same no Lospalos. Ha’u apela nafatin ba joven no timor-oan sira hotu atu tau konsiderasaun nafatin kona-ba COVID-19 iha Timor-Leste no iha mundu ne’ebé hamate ona ema barak,” Lere Anan Timur hateten ba jornalista sira, hafoin enkontru ho Prezidente Repúblika, kuarta ne’e.

Lere husu ba timor-oan sira labele hatudu hahalok violentu hodi tebe-rai, maibé bainhira la prevene hodi la halo tuir regra ne’ebé fó sai hosi Organizasaun Munidál Saúde mak bainhira ema lakon vida, lakon inan-aman no lakon feen ho oan, hafoin mak arrepende maibé sira mate liu ona.

Iha parte seluk, Lere Anan Timur informa kona-ba membru seguransa no defeza (PNTL no F-FDTL) ne’ebé baku pasiente COVID-19 iha Suai ne’e, nia parte orienta ona komandu Suai atu haruka relatóriu, atu nune’e bele investiga pesoál sira-ne’ebé baku pasiente refere.

“Ha’u haruka ona komandu Suai tenke lori relatóriu forsa ne’ebé baku pasiente COVID-19 iha Suai ne’e mai atu estuda no halo análiza. Nia baku tanba razaun saida. Ha’u hanoin baku tanba iha razaun, tanba ne’e husu komunidade no joven sira katak ita hotu-hotu vítima ba COVID-19 maibé sé mak sakrifika liu. F-FDTL no PNTL mak sakrifika liu tanba sira husik sira-nia família hela iha uma tanba serví povu no nasaun ida-ne’e,” Lere hateten.

Membru F-FDTL no PNTL dezloka ba Munisípiu sira bazea ba desziaun hosi Governu hodi fó seguransa ba populasaun sira ligadu ho moras COVID-19 ne’e. Tanba ne’e, nia husu ba joven sira atu koopera no servisu hamutuk no labele kria problema.

“Ha’u husu joven sira atu koopera hamutuk no labele kria problema. Tanba, ita servisu hamutuk mak bele ultrapasa situasaun hirak ne’e. Maibé, ita buka kria problema ba malu de’it mak problema ne’e sei aumenta tan de’it,” Lere dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here