Enkontru via zoom hodi kompañia aprezenta planu mestre HNGV ba MOP. Imajen/MOP

DILI, 20 abríl 2021 (TATOLI)—Konsultór lokál Mafra servisu hamutuk ho HCM Excellence, aprezenta ona estudu viabilidade no planu mestre  Hospital Nasional Guido Valadares (HNGV) ba Ministériu Obra Públika (MOP).

“Objetivu mak atu trasa serbisu konsultan ho rigór, tuir timeline ne’ebé válidu ba estudu viabilidade no planu mestre HNGV, ne’ebé mak daudaun to’o ona iha faze Interim Report I ne’ebe prodús tuir rekerimentu termu referénsia atu fó konsiderasaun tékniku,” refere nota ne’ebé Agência TATOLI asesu, kuarta ne’e.

Ekipa ne’ebé akompaña planu mestre ne’e liuhosi telekonféresnia, kompostu hosi Diresaun Jerál Habitasaun no Urbanismu (DGHU), Diresaun Nasionál Edifikasaun (DNE), asesór Gabinete Ministru, tékniku Planeamentu Urbanu no Abitasaun no ekipa tékniku hosi Ministériu Saúde (MS) ne’ebé hamutuk hamahon-an iha Project Steering Committee (PSC) ba projetu Estudu Viabillidade no Planu Mestre ba Hospitál Nasional Guido Valadares (HNGV).

Iha ámbitu aprezentasaun, foka ba dezenvolvimentu estudu viabilidade ne’ebé kabe ba Site A (ezistente) no Site B (ezpansaun) ho metodolojia ne’ebe kompreensivu atu haree ba aspetu tékniku no fiziku, sosiál no ekonómiku, analiza ba merkadu no finanseiru.

Nune’e mós, diskute dezenvolvimentu planu mestre ba Site A ho ninia progressu pur faze (faze 1 to’o 5), tuir rekomendasaun konsultór.

Ikus liu, analize idrolójiku relasiona ho akontesimentu dezastre naturál  ne’ebé hamosu inundasaun iha área li’ur no besik-besik HNGV nian.

Entretantu, enkontru atualizasaun servisu konsultór ne’e mós ho objetivu atu identifika obstákulu no lakuna sira durante períodu implementasaun estudu ne’ebé hetan atraza tanba pandemia globál.

Hosi obstákulu durante COVID-19, membru PSC sira ne’ebé lidera husi Diretór Gerál, Roger Tertuliano Belo, halo esforsu atu revee no avalia serbisu konsulór hodi fó rekomendasaun pertinente atubele asegura kualidade estudu.

Hamahon-an iha PSC mós inklui donu projetu rasik, MS no  fasilitadór MOP no Ministériu Planu no Ordenamentu (MPO), inklui Ajénsia Dezenvolvimentu Nasionál (ADN).

Maski nune’e, atividade konsultór iha faze preparasaun relatóriu hasoru difikuldade tanba situasaun COVID-19,  maibé konsultór iha kompromisu atu hato’o relatóriu ne’ebé ho kualidade a’as hodi responde ba nesesidade Governu no nasaun hodi reabilita HNGV ne’ebé sei fornese servisu saúde ba populasaun rai laran.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here